| 得獎後有乜轉變？「就係一次過做咗20年來要做嘅訪問！」 | next 1/1 pre |
 | |
| 風光過又兜踎過的韋家雄，經歷高低起跌後，學識做人拎得起放得低。 | next 1/1 pre |
 | |
| 唔講唔知，韋家雄演員生涯第一個角色就係做男主角。 | next 1/1 pre |
 | |
| 不過之後做咗兩年二打六角色，都係行行企企。 | next 1/1 pre |
 | |
| 就算要做搬貨、去廁所換香精幫補生計，韋家雄從來無放棄過演員身份。 | next 1/1 pre |
 | |
| 隨緣、不強求！正是韋家雄的寫照。 | next 1/1 pre |
 | |
| 《梟雄》中飾演麥瀚林：黃秋生改變咗我好多處理角色嘅諗法，同佢合作令我上咗一次訓練班，慳咗萬幾蚊學費，仲學咗半年，好抵！ | next 1/1 pre |
 | |
| 《旺角監獄》中飾演箭豬：呢個係我離開TVB去做生意後接嘅唯一一 套戲，要一星期漂一次頭髮，好擔心從此變光頭。 | next 1/1 pre |
 | |
| 《談判專家》中飾演齊家全：呢個劇拍到我神經衰弱，因為我本身畏高，拍跳樓戲真係拍到我暈！ | next 1/1 pre |
 | |
| 50歲奪最佳男配角。 | next 1/1 pre |
 | |
| 韋家雄表示年輕時不常影相，保留至今的照片少之又少，這兩張總算可讓人一窺他年輕時「未係肥仔」的模樣！ | next 1/1 pre |
 | |
| 入行前做過幕後及廣告攝影師的韋家雄，堅拒走回頭路，努力追逐演藝夢！ | next 1/1 pre |
 | |
| 韋家雄（左起）、韋母、韋家輝 | next 1/1 pre |
如果韋家雄不是捧走了《萬千星輝頒獎典禮2015》「最佳男配角」，觀眾對其認知大概僅限於「韋家輝細佬」！正如家雄談到得獎的最大轉變：「就係一次過做咗20年來要做嘅訪問！」過慣平淡生活的他結過婚，離過婚，亦有個仔，入行前做廣告攝影師，入行後第一套劇就做男主角，雖然有個金牌電視人阿哥韋家輝，又獲著名監製戚其義力撐，惟家雄情願做搬運工人、在公廁換香精，都堅持靠雙手延續演藝夢！曾做LED燈生意做到去日本開廠，但一場海嘯將辛苦建立的悉數沖散，還扛上一大堆債，重返TVB，未幾又被掟去做人肉布景板⋯⋯
現年50歲，風光過又兜踎過的韋家雄，經歷人生種種高低起跌後，拎得起更放得低，因為人生際遇冇得揀，但心態絕對有得揀！
家雄捧走的「最佳男配角」，可說是以入行逾25年的艱辛奮鬥熬成的，難怪他得獎後既激動又萬分喜悅！回想當初選擇演員這條路，家雄其實帶點漫不經心：「入行前做幕後，燈光阿頭要人開工，我就係其中一分子，電影、廣告、MV都做，四百蚊一組，每個月有萬零蚊收入，算唔錯！後尾轉做攝影師，見啲演員埋位一句對白講足一日都仍然NG，一Cut機就匿晒入冷氣房嘻嘻哈哈，咁樣我都得有日放飯揭周刊見招考藝人，咪去考，結果得咗！做咗藝人的確舒服咗，場戲有你先需要喺度，做幕後就要場場跟晒。嗰時我喺亞視第一個戲係單元劇《暖流行動》，我做主角，蔡曉儀做我女友，但做完呢次主角，我做咗兩年二打六、甲乙丙丁戊，好多閒角，一日走好多組，做完賊又做某某侍應，直至《點解阿Sir係隻鬼》，有個演員有半頁對白好蹺口，講極都講唔到，監製戚其義話：『矮矮哋嗰個講咗佢！』嗰時我未係肥仔，於是放飯係咁背，一Take過搞掂。之後阿戚開套台慶劇《戲王之王》搵我做第三男主角，有江華、呂頌賢同我，開頭唔敢相信，個劇出街仲試過專登走落超市，睇吓有冇人認得，點知行咗粒幾鐘都冇人認出，我好畀心機做，但原來個台冇人睇，做咗等於冇做！呢個係阿戚過TVB前最後一個劇，之後我都走埋。」
勒住肚皮過日子
離開亞視後，家雄不但未有重返高薪厚職的攝影師崗位，亦未有求助當時已由電視界跳入電影圈的哥哥韋家輝，反而揀選一條頗為戲劇性的路：去土瓜灣搬貨！他亦試過在公廁換香精：「每間廁所每個尿兜咁換，開工孭住一大袋香精，個人好似浸咗喺啲香精油度咁，只要我行入廁所，你即刻唔覺個廁所臭。嗰時要計準袋幾多出去開工，因為袋多咗，收工仲有香精又要返公司。點解唔返轉頭做攝影師？因為我堅持想做演員，你一旦返去做幕後，就唔會再做演員，我要堅持，既然想做演員就做嗰時出面都有散工搵我，都會拍，拍一組戲收入大約2、3千，拍5、6組左右，但拍完一個戲，可能半年冇戲做，收入當然差，要靠換香精、搬貨嘅正職維持生活，勒住肚皮過日子，見到朋友唔係借，係問佢哋：『有咩啱我做？』我做慣幕後都係搬搬抬抬，OK吖！」
「閒角」常客燃燒時間
正所謂戲如人生，等着家雄的，還有更戲劇性的一幕：「嗰時換香精，要喺廁所等人屙完尿先換得，冇理由人哋屙緊尿，你伸支臂去夾？有次喺廁所度等，有個人問：『你咪ATV嘅？』我認！佢問係咪拍緊戲，我話唔係，等緊夾你嗰個香精！我又唔覺得落泊喎，都係正當職業，嗰時我都有7、8千蚊一個月，嗰個年代算高，話晒厭惡性行業，若果你睇唔起我，你份工唔會好得我好多啫？就喺我夾香精夾咗一年左右，有次喺超市撞番戚其義，佢問：『你仲喺ATV？』我答佢走咗啦，佢問：『點解唔搵我？』佢走嗰時講過若果我離開ATV可以搵佢，但我唔記得咗，加上又未係好熟，之後佢叫我快啲攞做過嘅劇剪餅帶畀TVB睇，等咗個零月，期間都冇話忐唔忐忑，繼續做番自己崗位，後來TVB簽我，就拍咗《O記實錄II》，到拍《真情》開始多人識我！」
係咪已經冇角色啱我做？
正如家雄自評演藝之路，愈做愈順後就有阻滯：「之後喺TVB做咗好多閒角，發覺自己做嚟做去都係咁，有啲失意，每日好似燃燒緊自己時間，次次打開劇本又係冇乜戲做，我問自己：『係咪已經冇角色啱我做？』試過Book我返嚟4、5個鐘，就為咗拍一場企喺人群中賣栗子嘅戲，我當時唔識諗，覺得自己好似臨時演員，好冇癮，又想出去試其他嘢，睇吓係咪真係唔適合做呢行，於是離開TVB，同朋友合作做生意，結果蝕到渣都冇，6位數左右，但冥冥中好似自有安排，畀我識到有份做煙花匯演嘅老闆，之後做咗LED燈生意，參與幻彩詠香江、上海世博項目，愈做愈順，仲喺日本搞埋廠，當時生意愈做愈大，賺凸咗之前蝕嘅好多好多，但冇諗過遇上日本311海嘯！」
享受工作靜待良緣
一場海嘯將家雄辛苦建立的悉數沖散，只為他帶來一大堆債：「睇到電視海嘯新聞地圖圈嗰個位好似自己工作嘅地方，搵咗一個星期，終於聯絡得上日本同事，知道所有嘢冇晒，我一生人未試過腦袋咁一片空白，嗰時同銀行借錢搞廠，好快收信要還數，惟有將成間廠頂畀人，都冇唔捨得，當時只係諗點去解決，搞掂啲數冇幾耐，唔知我生意失敗嘅戚其義打嚟問：『有冇興趣返TVB？有個角色好啱你！』我冇考慮，我需要一份工作，就咁我又返咗TVB，直到依家，返嚟都做咗好多閒角，但我開始享受做演員！就算等好多個鐘、冇對白、企後面、冇戲做都好，以前係『老棟』（齋企），依家係諗點樣演繹每一場戲，就算得幾場戲，我都好花時間處理，希望就算只係做個閒角，你都記得有我出現，漸漸又多人用番我，多番機會！」
任23歲囝囝自由發展
家雄如今抓緊自己熱愛的演藝工作，哪感情路上抓緊了紅線沒有？他淡淡然道：「大約喺拍《公公出宮》前，我同女友分咗手，依家單身，同前女友都有3年感情，但要緣盡就緣盡，我會隨緣去等，要嚟始終要嚟，要走始終要走，唔會刻意安排。我之前一段婚姻都維持咗十年，嗰時廿零歲年少輕狂，唔細心體貼，貪玩又冇顧對方感受，成日去到好夜先返屋企。我同前妻有個仔，一路跟住我，依家都23歲，前排幫我公司做嘢，可能覺得唔係咁適合，等佢自己慢慢發展。」隨緣！不強求！家雄果然是「五十而知天命」的寫照！
後記：海闊天空
禍兮福所倚，福兮禍所伏！順逆起跌交替出現，成了家雄人生的主旋律，若家雄當日生意愈做愈大，可能就不會有今日的「最佳男配角」《梟雄》麥瀚林了！在韋家雄身上，說明了在得與失之間，並非一時三刻能下判語：「一時失志不免怨嘆，一時落魄不免膽寒。」一生中無情的海嘯接踵而來，能否屹立不倒，端看個人的韌性！
|
鍾意就快D Share啦！
|
|
|
