阿倫爆溫拿恩怨阿強掌摑陳友
溫拿五子前晚為新碟《溫拿精神》新曲加精選宣傳時，譚詠麟（阿倫）踢爆成軍43年的溫拿成員葉智強（阿強）曾變身「葉問強」，當眾掌摑隊友陳友，幸由他出頭當和事老，加上兄弟夠包容，終於一飯泯千仇，和氣收場。
《溫拿NEVER SAY GOODBYE演唱會2016》將於下月6日起假紅館開鑼，溫拿五子前晚齊集火鍋店為《溫拿精神》新曲加精選宣傳及提早食團年飯，並向在場食客派溫拿賀年揮春，阿倫更興奮得企在櫈上高舉揮春，令全場起哄。
溫拿於去年底一度傳解散後，早前輪到日本天團SMAP傳出解體，兩宗消息均令萬千Fans心碎，幸好SMAP宣布不拆夥兼鞠躬道歉，身為「過來人」的阿倫高興地說：「謝天謝地，否則我哋又要寫道歉信，好在健仔（彭健新）肯聽我哋講。」他們又指溫拿跟SMAP不可相提並論，陳友覺得溫拿五年才「合體」一次，彼此各有發展空間，加上沒有利益衝突，故一定不會解散。
請食飯泯恩仇
問到溫拿成軍43年，五子中誰屬「麻煩友」，阿倫則踢爆是阿強及陳友：「幾十年前（1978年）拍（導演）吳宇森部電影（《追趕跑跳碰》），阿強好似葉問上身，喺陳友面度『打詠春』，呢件事吳宇森可以做證！」面露尷尬的阿強即喃喃自語：「又提。」並解釋：「當年拍戲拍到發脾氣，又熱又忟，身又痕啫！」38年前當眾受辱的陳友直言有嬲：「不過嬲完有飯食，食得好冧添。」問到誰出面擺平？阿倫即認頭：「仲有邊個呀？兄弟嚟，唔會放喺心中，發生咗就係發生咗。」不過阿倫輕責「手足相殘」：「出手打人一定唔啱阿強，所以咪要請人食飯囉！但兄弟冇隔夜仇嘅。」
問到個唱排練進展，阿倫指綵排與錄歌雖各有各做，但夠默契不成問題，至於會否減肥？阿倫似有所啟發說：「今年我諗通咗，我哋有高矮肥瘦，我梗係做肥嗰個我諗住最後三個星期衝刺。」鍾鎮濤（阿B）則和應，希望能拉勻身形。正如阿倫所言，火鍋店內見阿倫盡情食海鮮與牛肉，還品嘗由朋友為紀念他入行40周年而訂製的紅酒。
幫隊友畫「蘇眉」
另外記者會前，阿倫為表兄弟情深，自言破天荒為阿強畫眉，更將化妝片段上載分享。健仔於片中指畫眉後的阿強似足丞相，阿強就覺得似「做大戲」，可是阿倫受訪時自誇化妝專業，陳友即指阿強是「蘇眉強」，力推阿倫化妝技巧好，氹得阿倫自豪說：「阿強唔落妝o架」
文：音樂組
|
鍾意就快D Share啦！
|
|
|
