張智霖幻想中1億年年請朋友旅行
今次真係恭喜發財！張智霖（Chilam）獲香港賽馬會邀請，為六合彩40周年一億金多寶拍攝宣傳片，曾經中過六合彩的Chilam不但畀幸運號碼益大家，更許下諾言，倘若中獎會開心Share，年年請朋友食飯、旅行，好友蔡一智、伍詠薇等，應該都希望Chilam願望成真，旗開得勝！
Chilam日前現身屯門賽馬會投注站，為將於3月1日開彩的六合彩40周年一億金多寶拍攝宣傳片，由於彩金高達一億，創下歷來六合彩金多寶攪珠獎金最高紀錄，故即使彩票於下周二（2月23日）才開賣，但吸取了2014年9月連續八期無人中頭獎，令頭獎獎金累積至1.5億，引發全城瘋狂的經驗，Chilam率先度好運財號碼，迎接這個本港開埠以來六合彩金多寶金額最高的攪珠盛事！
「始終會中一次」
雖然2月中Chilam要到外地工作，他說一定會買：「買六合彩係香港人傳統，亦係另一種途徑做善事，中獎當然開心，唔中都可以做善事，係雙贏局面。（有心水號碼？）我買嚟買去都係自己生日：8號、27號，我覺得我始終都會中一次！其實我之前都中過，雖然係安慰獎，但都好開心。（仲有其他幸運號碼推介？）我嘅生日就係我嘅幸運號碼，我誠意推介畀大家！」翻查資料，Chilam前年就曾為巨額六合彩貼出1、8、16、24、32及40，說不定他說的「始終都會中一次」，指的就是這組號碼。
「捐一半做善事」
Chilam更闊綽的說：「諗吓一億彩金點用都唔算好傷腦筋，如果我中咗，我會攞一半捐去做善事，如果一億就捐五千萬出去，幫助社會上有需要嘅人士，咁其餘五千萬都唔知用嚟做乜好喎，可能請朋友食飯，分享係最開心嘅，但五千萬點食呀？請埋朋友去旅行啦，年年請食飯同去旅行就差唔多嘞！」作為Chilam朋友亦幸福滿瀉！
Chilam置身屯門投注站內，見到公開展覽用的攪珠機，不忘摸摸沾運氣說：「今次幫馬會做六合彩推廣，知道好多六合彩同香港嘅歷史，仲見到呢部Vintage六合彩攪珠機，呢啲通常喺電視度先會見到，今次我不但見到，仲可以摸到，又可以近距離睇吓啲波係點，都係好好嘅經驗！我祝投注人士猴年旗開得勝，節節勝利！」
文：影視組
|
鍾意就快D Share啦！
|
|
|