推住三個喼，魏駿傑一馬當先，同囡囡跟後嘅傑嫂張利華，點解嬲咗成村人咁呢？
同你吟一吟
咁又過完年！
無論係周圍去拜年𢭃利是、開賭、大覺瞓又或者出埠避年都好，話咁快，又過咗一個農曆新年！踏入𤠣年，除咗旺角黑夜一幕幕動魄驚心嘅衝突場面，仲有股市狂瀉，其他，不外係呢啲。
魏駿傑兩公婆冇多句
舊年因為老婆同香港單車手鄧宏業密會，搞到幾乎離婚嘅魏駿傑，選擇帶埋妻女離港度歲。
大年初一出發，魏駿傑推住三大喼行李，老婆張利華就負責照顧囡囡 Jessica。
一家三口去旅行，但魏駿傑同細自己廿年嘅重慶老婆，全程零交流，唔通真係學佢話齋，心入面有條刺！老夫少妻，始終牙煙！
黐到星爺 錢國偉肥囉！
唔想因為黃金假期同人逼，又要買貴機票出埠嘅肥 Wilson錢國偉同 Mani霍汶希，大年初二就去咗銅鑼灣蓮花宮拜神。
賀歲片《美人魚》票房响內地贏到開巷，身為該片執行導演嘅錢國偉，過年前還神，過年就去拜神，咁神心，唔通有分紅？黐到星爺，錢國偉由「夜蒲導演」，變成廿幾億「執導」，不得了！
Mani抱女拜太歲
至於比肥 Wilson遲一個鐘先到蓮花宮嘅單親媽 Mani，當日一車人有老有嫩，包括就快五歲嘅囡囡 Honey。
只要一家人齊齊整整，無論選擇做乜，都開開心心！八珍在此補祝大家新一年身體健康！事事如意！
吳君如男女家團拜
傳聞陳可辛堅持不婚政策，但每逢大時大節，都會安守本分，交人！
上星期五（初五）四點，《壹》仔見到陳可辛扶住老豆陳銅文，吳君如就陪住自己老媽子，喺數碼港廣場外等司機接。
男家女家都有代表出席新年家庭活動，充分象徵係一家人，簽多個名又如何！
撰文：八珍
來源 source: http://hk.next.nextmedia.com
|
鍾意就快D Share啦！
|
|
|