爆壹爆
中環專業夜蒲女
爆哥教精大家，知唔知點解中環夜場總係咁多性感靚女呢？原來佢哋之中唔少都係「職業蒲女」。依家中環大約有六、七間夜場，都會定期請一班靚女扮客人，吸引男人去玩同消費。保守估計，現時成個中環夜蒲界，起碼有超過八十個呢類職業夜蒲女。
爆哥知呢件事，事關前一排識咗一個職業夜蒲女 Amy，佢本身係自由身模特兒，做職業夜蒲女大半年。 Amy話，做呢行嘅女仔，乜嘢人都有，除咗 model之外，有讀大學嘅學生妹，仲有喜歡夜蒲想認識富二代兼唔想使錢又想有免費香檳飲嘅拜金女。
職業夜蒲女係計時薪，每晚最少返三粒鐘，時薪由百幾蚊至四百幾不等。咁佢哋主要做咩呢？「時薪百零二百蚊，可能只係搞吓氣氛，去舞池跳吓舞，令到個場熱鬧啲，當然令到客人開酒更好。而收四百幾一個鐘嘅，每當有大客到，都要主動坐低陪客人飲酒傾偈，當然佢哋衣著，一定會行性感低胸。」 Amy話因為本身模特兒工作收入唔穩定，所以做呢份兼職，每個月都有七、八千蚊收入。不過，夜店男客毛手毛腳就預咗，所以 Amy話做呢行一定要執生，要主動推開鹹濕佬隻手，又或者借尿遁，盡量保護自己。
父親非常手段教仔
爆哥都知生仔容易教仔難，況且依家嘅細路精過鬼，為人父母真係個個教到嘔血。爆哥以前嗰代就話藤條出好人，但依家呢個年代就掂吓都話你虐待，真係難搞。爆哥咁大感慨，因為早前遇見一個非常父親，選擇用非常手段教導不斷扭計嘅仔，手法好似好狠心，引來途人指指點點。
爆哥上星期去到調景嶺港鐵站提款機對出位置，見到一個身穿黃色外套、年約三歲嘅細路，成個人背脊向上瞓喺地上，不斷爆喊扭計，引來唔少途人圍觀，大家你眼望我眼，唔知個細路因咩事喊。有個女途人忍唔住上前問個細路咩事，即時俾一個中年男子大聲阻止：「唔好理佢，由佢喊。」個女途人嚇一跳，睇清楚原來佢係細路個老豆。因為個老豆唔想個仔用喊來威脅阿媽，所以採取以硬制硬手段同佢鬥耐性，個細路最後發覺喊都冇用，就自動起身向父母乖乖道歉，圍觀嘅人都喺度議論紛紛，個老豆到底係識教仔定唔識教呢，你話啦？
良景金毛「管理員」硬砌新義安
爆哥睇《壹》仔早幾個月前已爆過料，話水房現任坐館肥威受一個街市大王委託，派咗一大班門生殺入良景邨，充當「管理員」驅趕附近阻住街市做生意嘅小販。不過，班小販因為有陀地新義安撐腰，所以冇有怕繼續開檔，不過《壹》仔爆完料，領展和食環都一直唔多理。
到咗農曆年，班小販為咗搵多啲錢，更多人靠近商場擺賣，水房人馬於是吹雞抗衡小販，而一眾金毛「管理員」亦收到 order，只要班小販一進入商場界線，就開拖打到佢阿媽都唔認得。所以上星期一連幾晚，良景邨好似變咗戰場，班「管理員」晚晚都同小販打大交，呢班水房仔真係夠晒無法無天。咁班自稱屯門清一色嘅陀地老新仔去咗邊度呢？爆哥收到風，本來負責睇場嘅新義安小頭目生菜，想向大佬蘇牛借兵還拖，但蘇牛唔知係咪上咗神枱唔想搞事，話還拖開戰會有手尾跟，加上新年流流唔想搞嘢喎，叫生菜暫時忍吓先。大佬唔肯幫拖，一班老新仔惟有潛水返屋企打邊爐烚吓烚吓，任由班水房仔橫行屯門，認真冇面。
爆哥乜料
金融界撈家，穿梭黑白政商界，朋友遍布旺角至中環，每星期都八到
唔同料，同《壹》仔讀者過吓癮！
|
鍾意就快D Share啦！
|
|
|