熱爆娛樂: 劉向蕙返大馬拜外公　劉華朱麗倩前後腳 [壹週刊

2016年2月25日星期四

劉向蕙返大馬拜外公　劉華朱麗倩前後腳 [壹週刊 - 1355] __,朱麗倩,劉向蕙,劉德華,劉華,M1,

上週朱麗倩帶埋 Hanna出發返大馬拜祭公公婆婆。

探熱針

劉向蕙返大馬拜外公　劉華朱麗倩前後腳

寶貝女劉向蕙（ Hanna）五月便四歲，劉華對愛女採取的保護政策，始終如一； Hanna返學要遲到早退外，還出動保鑣、工人護 B，完全密封！

上週，朱麗倩帶埋 Hanna返馬來西亞老家拜祭公公婆婆，事前做足準備功夫，除了避開新年旅遊旺季確保低調外，劉華更刻意要同妻女分開起行。

兩母女現身機場出發當日，朱麗倩發現記者時，表現鎮定，若無其事繼續同身邊人傾偈，仲罕有地露出笑容，天王嫂突然大方！讚！

請假唔返學

正在趕拍電影《王牌對王牌》的劉德華，曾打算農曆新年陪妻女返大馬老家拜年。但一家三口出動實在礙眼，諗過度過，最終打消原意；改由朱麗倩帶同囡囡先行動身，待妻女返港後，三月初劉華再單拖起行，飛返大馬，順道拜祭外父外母。

「唔揀過年去，因為明知假期機場多人多記者，惟有幫囡囡向學校請幾日假，正月十三先出發，去四日就返。華仔留喺香港拍戲，之後要飛歐洲再拍多一個禮拜，返嚟先自己一個飛大馬，因為佢習慣咗年年都返去嗰邊拜吓外父外母。

「雖然 Hanna都咁大個，但華仔始終唔想一家三口一齊喺公眾地方出現，因為會混亂，佢最驚係嚇親個女，佢仲成日同身邊啲人講，話如果喺街度見到，記得叫佢 Hanna好喇，唔好大叫劉德華個女！」知情者說。

為確保低調，劉華一家返大馬探親，刻意避開新年旺季，甚至前後腳出發。

就快四歲的 Hanna大個女咗，但一樣咁靚女，全程攬實工人，勁嗲！

戴住口罩的朱麗倩，同囡囡全程保持距離。

若無其事

天王女出遊，例牌大陣仗！上週六（二月二十日）早上七點半，朱麗倩帶住 Hanna，在兩名保鑣、工人同助手護駕下現身機場。快將四歲的 Hanna長高了，頭髮也長了不少，眼大鼻高，正如劉華所講：「點睇都係一個靚女！」

著住藍色羽絨、牛仔褲加波鞋，頭上夾住髮夾仔的 Hanna，全程眼仔碌碌，不停兩頭望，非常得意。

兩名保鑣做先頭部隊，到出境大堂，幫事頭婆辦好行李寄艙手續，之後再到閘口附近巡察。確保安全後，工人便抱住 Hanna落車，由保鑣陪同行先，戴住口罩尾隨的朱麗倩，全程刻意同囡囡保持幾個身位。

一行六人浩浩蕩蕩入閘，沿途 Hanna不停八卦四圍望，人仔細細，但相當眼利，見到記者影相，更好奇地望實記者鏡頭，眼都唔眨，萌爆！

過不久，朱麗倩亦發現記者，以往一定響警號，派保鑣又遮又擋兼運路走的她，今次卻一反常態，淡定到若無其事，繼續同身邊人有傾有講，大方笑住任影。

Hanna四圍望，見到記者鏡頭，眼定定望實唔眨眼。

搭無人駕駛人逼人，其間朱麗倩撞到劉華粉絲，友善打招呼傾偈。

校到最後一秒，一行人先急急腳上機。

手戴佛串

一行人坐無人駕駛列車前往閘口準備登機，沿途朱麗倩撞到幾名劉華忠實粉絲，又笑晒打招呼，好友善。上到列車， Hanna嗌熱，朱麗倩同工人夾手夾腳幫她除下羽絨，換上牛仔褸，只見 Hanna的手上原來戴住一條黃色小佛珠串。

其間， Hanna不停口噏噏搵人傾偈，又伏在工人膊頭，嗲到爆！見未夠鐘，一隊人於是到機場的貴賓室等，兩名保鑣則繼續守在門口巡視；直到最後一刻，才急急腳行去閘口登機。

「今次係 Hanna出世之後，第二次返媽咪鄉下，不過今次係第一次去拜公公婆婆，朱麗倩啲家姐就成日嚟香港探佢哋，舊年聖誕先嚟住咗半個月，今次帶 Hanna返去，順便見吓嗰邊啲親戚。」知情者透露。

去年朱麗倩生日抱埋 Hanna飛北京探老公班期間，在當地的朝陽公園遊覽。

去年 6月， Hanna第一次返大馬媽咪娘家。

近月劉華正同黃曉明趕拍電影《王牌對王牌》，完成後就會飛大馬拜祭外父外母。

朱麗倩佗 B時，細妹專程由大馬飛到香港陪伴。

同 fans拜年

對 Hanna高度設防，但對視如「家人」的 fans，劉華開始豁出去，每逢聚會，都帶埋妻女現身。大年初二，劉華開放位於九龍灣的公司，讓粉絲出席團拜活動。據知，當日朱麗倩同 Hanna都有亮相，其間 Hanna仲開金口，同粉絲們講「新年快樂」。

逐一向粉絲派利是期間，劉華搞笑話：「今年啲利是冇跟通脹，下年補番！」原本打算叫 Hanna先返入後台，但囡囡極黐身，樹熊一樣擒住老豆唔放，要天王老豆又呵又氹， Hanna先肯跟媽咪走。

「今年有成千 fans排隊上去拜年，一共分咗三個時段。大嫂（朱麗倩）同 Hanna三場都有上台，阿嫂第一次開聲講嘢，同大家講咗『身體健康』， Hanna就講『新年快樂』，但仲係好怕醜，講得好細聲，之後華仔氹極佢都唔肯再講。」一名有份在場的 fans說。