麥當娜3級過蕉 笠Eason$620
澳門新濠影滙前晚匯集兩大巨星，國際樂壇天后麥當娜（Madonna）開騷抽中香港樂壇天王陳奕迅（Eason）上台上演世紀舞鬥，Eason樂極忘形失手跌倒，令麥當娜笑到跪低。雖然Eason老貓燒鬚，但都獲娜姐送上香蕉「安慰」，兩人之後又妙語連珠，大玩不文笑話！
麥當娜前晚於新濠影滙舉行《Rebel Heart Tour》首場澳門騷，大批歌迷包括Eason一家三口到場朝拜。麥當娜尾聲獻唱《Unapologetic BXXch》時循例邀請一名歌迷上台共舞，Eason因在台下出位勁舞，獲挑選為幸運兒，實在是意外驚喜！Eason上台後興奮大跳特跳，期間又被舞蹈員夾住，讓麥當娜先後用手與腳打屁股，不過在舉中指環節Eason擔心教壞女兒，只舉無名指。Eason愈跳愈激，突然跳起其招牌動作break dance跨腿舞，卻老貓燒鬚做了滾地葫蘆，令麥當娜笑到跪低！不過Eason再做蜈蚣彈起身攞番彩。其後麥當娜熱情地捉住Eason的手高舉，大讚他厲害與勇敢。
麥當娜：「你叫乜嘢名，年輕人？」
Eason：「Sorry？（乜話）」
麥當娜：「Sorry就係你個名？」
Eason：「我個名叫Eason。Season冇咗個S。」
麥當娜：「你係咪嚟自澳門？」
Eason：「我嚟自香港！」（舉手做出搖滾手勢）
麥當娜：「頭先你係咪跳香港嘅經典舞步？」
Eason：「我諗唔係啦，只係一啲癲喪舞步，我係唔想重複番Evelyn之前跳隻舞。」
麥當娜：「你唔想跳佢隻funky chicken（狂野雞舞）咩？」（一邊跳香港騷第二晚嘉賓Evelyn的舞一邊問）Eason立即跟着跳起來，冷不防被麥當娜搶去眼鏡戴上。
麥當娜：「天啊，你咁樣睇落靚仔好多。」引得全場大笑，Eason亦笑得彎下腰。
銀紙塞入胸前
麥當娜之後將手搭在Eason肩上，並大讚Eason的表現。
麥當娜：「做得好呀Eason，我未見過咁嘅舞步！我哋每晚都會向Unapologetic bxxch送禮物，你亦唔例外。你練咗幾耐？」
Eason：「冇！」
麥當娜：「咁你飲咗幾多？」
Eason：「其實我今日冇飲，我唔使飲都可以natural high（自然興奮）。」
麥當娜脫下眼鏡歸還Eason後，與他玩high five（擊掌），但她又整蠱Eason故意拍空。
玩得意猶未盡的麥當娜繼續問Eason今日收了幾多錢？
Eason：「我冇收錢，你要我做乜我都會做！」（說罷單膝跪地，高舉雙手）
麥當娜：「身上有幾多錢？我唔理幾多，總之畀少少錢我。」
Eason站起來摸褲袋，摸出一張銀紙，被麥當娜一手奪去。當麥當娜再問「仲有冇？」後，Eason搖搖頭，但將銀紙拿多兩次出來，共620元全被麥當娜搶走。
麥當娜：「畀埋我！係咁多啦？真係可惜，MotherfXXker！」
麥當娜將銀紙塞進胸前衣服，拍拍心口袋袋平安，但她還是未夠喉，親自摸進Eason屁股褲袋，令Eason笑得見牙唔見眼。
掛住傾偈被鬧
麥當娜突然爆粗表示自己太興奮，而忘記未派「禮物」，即轉身從舞蹈員手上拿過香蕉，回頭看見Eason與另一舞蹈員聊天，將香蕉藏到身後，更「教訓」Eason！
麥當娜：「喂Eason唔准傾偈！（Eason交足戲扁嘴低頭道歉。）呢個係特別嘅時刻，就好似頒獎禮咁，只不過你唔係攞奧斯卡，係攞條蕉。」說完從身後拿出香蕉送給Eason。
麥當娜：「你值得攞呢條蕉，你嘅表演無可置疑。你知唔知要點用條蕉？係PG級（家長指引）、R級（成人觀眾）定X級（打真軍）先？」
Eason：「乜級都得，你想我點做？」
麥當娜：「X級，不過又唔使依家做嘅。」
Eason：「我個女在場呀。」麥當娜瞪大眼睛，側頭嘻嘻笑。
麥當娜：「我係話你會用屋企部Xbox同隻蕉玩呀。」
最終Eason被請下台時，向麥當娜送上飛吻。而麥當娜亦向Eason示愛，但就抵死地向他說：「你攞唔番啲錢」
文：外娛組
|
鍾意就快D Share啦！
|
|
|
