張智霖蜜蜜載 靚靚擺陣旺夫
張智霖（Chilam）去年工作爆棚賺到豬籠入水，身為廿四孝丈夫和父親的他，日前駕車接太太袁詠儀（靚靚）到銅鑼灣為新春精心挑選揮春和糖果。靚靚坦言十分重視農曆新年，家中會「擺陣」貼滿揮春和放滿糖果取其意頭，她說新年願望是老公張智霖工作接踵而來，成就她年輕又有錢的退休計劃。
張智霖去年工作「業績」相當理想，曾參與內地真人騷《兩天一夜》第二季，又與愛妻袁詠儀拍住上參與了《一路上有你》、《一路上有你2》和《為她而戰》的演出。Chilam也舉行了巡迴演唱會，亦接拍了多個不同類型的廣告及擔任代言人，除了人氣爆發外更賺個盆滿缽滿，今年實行過肥年迎猴。
賺錢謀退休
Chilam與靚靚結婚多年恩愛如昔，日前Chilam就出動名車擔當柴可夫司機，接載靚靚到銅鑼灣為新春辦年貨。靚靚甫下車便會合女友人，二人立即急步走到附近一間賣賀年揮春的店舖入貨。見靚靚細心選購，不時拿起多個不同款式的揮春作比較，最後買了揮春就離開。
然後靚靚又走到鄰近一間老字號糖果店選購應節糖果，期間不時與店員有傾有講，雖然店內人頭湧湧，但未有影響靚靚購物心情，她還開懷大笑樂在其中。入貨後她拿着戰利品離開，再到隔籬街會合一直在車上等候的廿四孝老公Chilam，然後便雙雙離開。
事後聯絡上靚靚，她承認當日是為新春掃貨：「我都係比較傳統，以往過農曆新年都會將揮春貼滿一屋，仲會放滿應節糖果喺屋企攞好意頭。」靚靚表示寓所剛完成裝修，早排忙於執拾：「咁啱我有工作在身，全靠老公出力搞掂晒，依家都搞得七七八八，配合番新一年新開始嘅意頭。依家到我忙住幫囝囝（張慕童）揀新衫、新鞋過年。」問到新年願望，她說：「希望老公多啲工作，賺多啲錢，成就我年輕又有錢嘅退休計劃。」記者祝她追「猴女」成功，她則開心表示照單全收。
新加坡度歲
據知，Chilam一家三口農曆新年間會與蔡一智一家結伴到新加坡旅行度歲，由於慕童與蔡一智女兒China非常老友，選擇新加坡是希望帶他們到當地的主題樂園玩，為小朋友帶來歡樂。旅程完結Chilam會返港再立即轉機飛到西班牙開工，為真人騷節目進行錄影。
文：影視組
攝：追蹤組
|
鍾意就快D Share啦！
|
|
|
