亞視拖糧，除咗員工成日唔可以準時收到人工外，有報道指亞視內部亦「山窮水盡」，清潔公司暫停服務，新聞採訪車冇錢入油要停用，新聞部租用通訊社服務只係剩返路透社，連大堂玻璃爛咗都冇錢補等等。喺亞視仲有節目嘅袁潔儀，坦言未收到12月份糧，暫時亦有啲藝人未收到。佢有節目要每星期返1、2日拍廠景，佢又話其實好多員工嘅底線，係留守到4月1日，法例都係依照咁做，亦多謝落廣告嘅客戶去到三月幾，大家都做咗朋友。袁潔儀更指，知道老闆都好想做，認為老闆接手時間短、大勢嘅環境，有更大嘅壓力，因為放咗接近一年心機入去，始終做唔到，新老闆同佢哋都係上下一致。問到12月、1月份糧仍未出，擔唔擔心?袁潔儀表示冇得擔心：「因為經歷嘅路程都咁耐啦，有好多時，每個月都有啲最壞嘅打算，唔單止我嘅，我諗所有即留咗喺亞視嘅員工，過年可能會掹掹緊，佢哋早喺一、兩個月都會為自己諗定路向又好，過年使費係點，做part time或freelance，我諗佢哋會為自己籌謀。」講到亞視「山窮水盡」，要刪新聞部時段，就連清潔阿姐都停工等，佢就話：「如果以單一間公司嚟計，唔好只係講亞視，無論你係大型、小型企業，佢如果去到一個地步，好大壓力，真係有啲員工畀唔到嘅，以老闆身份嘅角度，好多嘢cut得就cut，冇辦法，係老闆遇到困難嘅困境，不止呢個行業係咁。」講到有關呢段新聞佢都不禁眼濕濕，被問冇人清潔?袁潔儀就叫留得喺度嘅員工，就自律同警剔啲，盡量乾淨啲。袁潔儀又指本身有啲住喺廣東定居嘅香港人，一定第一時間扭開香港電視台，佢續道：「唔止我哋個台，友台都會睇吓，照顧唔到呢班人，佢哋係會幾失落。」佢認為無論佢哋個台有幾多人睇，都有一啲觀眾，如果觀眾冇咗個台會覺得好可惜，冇咗睇電視嘅福氣，反而國內有好多台可以睇。
|
鍾意就快D Share啦！
|
|
|
