黎明今晚早咗開騷呀！唔知個騷有冇機會長過尋晚呢？
黎明首個4D騷因為牌照問題即日宣布取消，不過經過黎天王及其團隊用了一整日用心「搶救」後，個唱終於在昨晚九時四十四分正式開鑼。雖然尋晚成個騷只係得個半鐘度，但係唔少樂迷都聽出耳油，給予演唱會極高評價。
不過由於首晚（即係原本嘅第二場）演出噪音超標，環保署逐警告黎明今晚場騷十一點一定要完，而唱片公司高層亦表示，今晚嘅騷喺夜晚十點半就會完。而為咗減低噪音，喺傍晚時分，場地仲開始搭建隔音障屏，希望一切做到盡善盡美。
由於今晚要趕住十點半完騷，結果今晚個唱真係比尋晚提早咗一個鐘開場，即係晚上八時三十三分已正式開騷（正確嚟講，係早咗一個鐘頭零一分鐘）。不過依家現場落緊雨喎，到底會唔會影響咗個騷嘅進行㗎？
其實黎明演唱會正式開始之前，黎天王有上台稍作現身，令全場起哄，兼企起身爭睹偶像風采。雖然現場落住雨，但甚少觀眾穿住大會派發嘅雨褸。對於噪音超標問題，黎明稍作回應說：「雖然噪音方面有少少影響，但係喺可以控制嘅情況下，會好好去處理，唔該晒大家！」之後帷幕再次落下，並播放預先準備好的開場片段，然後黎明就喺八時三十三分正式現身。
來源 source: http://hk.on.cc
|
鍾意就快D Share啦！
|
|
|
