從不參加金像獎這個「遊戲」的杜琪峯，今年依舊缺席，但不代表漠不關心。成本是50萬，僅獲一項提名——「最佳電影」的《十年》，一舉摘下這個獎。結果，電影商協會、前金像獎主席、各大電影公司老闆，甚至本屆金像獎主席、董事爭先恐後表態。寰亞老闆搶得頭香，當晚即發聲明，指《十年》得獎，是「香港電影界的不幸」，更稱:「大家看到，《十年》今次沒有得到任何獎項提名，亦非最賣座，證明不具備最佳電影的質素。《十年》成為最佳電影對電影人來說不公平，是政治綁架了專業，將電影評獎活動政治化了。」然後洪祖星、吳思遠、黃百鳴等亦紛紛表態，槍口指向《十年》，罪名千奇百怪。今晚杜琪峯到奧海城出席《樹大招風》首映，被問及點睇《十年》得獎，他就說:「咁多年嚟，電影金像獎我都唔參與唔講0架喇，但今次都要講下，原因就係今年好似好有passion，好有熱情。今次我諗大家都係針對《十年》攞獎呢個講法，我覺得，創作係需要自由嘅，係應該唔需要有束縛，係透徹嘅。」「每一個城市，就算鄉村都好，佢都應該有佢自己嘅感情。當感情發揮到好真實，同埋令到大家有感動嘅時候，佢就會有一種要抒發嘅感覺。當感情被壓抑嘅時候，佢最後只有越澎湃嘅啫。」「我自己嘅講法就係，評審都同意，同埋一切嘅投票人都同意嘅話，係應該大家接受到(指《十年》得獎)。」那杜Sir是否認同這個賽果？他說:「我好推崇一啲年輕導演，好似我哋《樹大招風》都係。一部電影嘅成功，同埋可以引起大家嘅關注，或者係得獎，大家要思考一下啦。」對於林建岳指斥今次《十年》獲獎是「政治綁架了專業」，杜Sir聞言即說:「林建岳呢個人，唔係拍電影0架嘛!佢係俾錢拍電影咋嘛!如果真係騎劫得到電影節，咁就騎劫咗好多年啦。35屆呀!邊個夠膽騎劫佢吖？出嚟講嗰個人佢自己都唔夠膽啦係咪先？呢一行，我哋咁多導演，咁多資深嘅製作人呀，邊個夠膽？呢個係冇可能，如果有，唔該你講個名出嚟俾我聽下，我未聽過，我唔參加唔好當我唔知，你唔好當我懵喎!」林建岳、黃百鳴等大老闆又指，《十年》只有一個提名，證明其可觀性有限。當時傳媒未有直接開名係邊個講，杜Sir即又勞氣地問:「又係邊個講嘅先？」得悉之後就說:「好喇，咁試問講呢啲嘢嘅人，佢嘅背景又係乜嘢先？請大家睇睇，佢係咪公道嘅先？即使林建岳係我咁好嘅老闆，我都要講，因為呢個係電影嘅自尊嚟嘅。如果咁樣，即係侮辱我哋啫。我唔去唔代表我唔投票0架。」至於金像獎主席爾冬陞指今屆評審被情緒主導，杜Sir稱:「爾冬陞作為一個主席就唔好講，我話嘅。你頒獎就頒獎，佢唔需要加嘢入去。佢係主席，佢有權講，但如果係我，我唔講，因為已經決定咗!」一句到尾，杜Sir真心型！
|
鍾意就快D Share啦！
|
|
|
