獨立宣言成最後畫面 劉錫賢轟亞視羞家羅霖爆喊
【告別亞視】亞視前日愚人節熄機鬧出大笑話，最後節目《Miss Asia 25th 葡萄牙瑰麗巡迴》竟還未播完便突然sharp cut中止訊號，羅霖節目中一句「經濟獨立特別係……」為59年歷史亞視畫上句號。應《蘋果動新聞》睇亞視熄機直播的羅霖和袁潔儀，眼見亞視突然「拔喉」感到愕然和憤怒，按捺不住情緒齊齊喊爆，劉錫賢亦怒斥亞視說：「好羞家！」
擁有59年歷史的亞視前日熄機，未有作任何特備節目告別，僅重播前亞姐羅霖和楊玉梅等於兩年多前主持的《Miss Asia 25th 葡萄牙瑰麗巡迴》與觀眾告別。有傳前晚熄機前最後一分鐘，畫面會顯示一張告別卡作惜別，但最終不但未有告別卡，就連該節目也沒播完，畫面呈現羅霖大頭說了一句：「經濟獨立特別係……」之後亞視突然中止訊號，近年來屢次鬧出笑話的亞視，最終也是爛尾收場。
■羅霖前晚應《蘋果動新聞》邀請睇亞視熄機直播，對於亞視突中止節目，傷心得當場落淚。攝影：陳慧安
■亞視最後節目重播早年亞姐特輯，當羅霖講到女性應獨立時就冇畫面。 電視圖片
■劉錫賢（右）和歐錦棠怒斥亞視突然拔喉舉動羞家羞恥。
「唔驚返唔到大陸」《蘋果動新聞》前晚邀請了亞視前台柱林建明（大姐明）、羅霖、劉錫賢、蔡國威、歐錦棠和袁潔儀，於蘋果日報大樓出席《真熄亞視live》直播，一起見證亞視熄機。原本緊張期待倒數的大姐明，目睹亞視突然「拔喉」時愕然O嘴，袁潔儀、羅霖和劉錫賢忍不住落淚，齊齊鬧爆亞視核突羞家。
節目結束後，羅霖仍泣不成聲：「當我望住自己即刻sharp cut嗰刻，真係好意外，我唔知係光榮定乜嘢，只係覺得太唔專業。呢一刻我係唔知點樣去形容自己嘅心情，仲係未平靜到。我諗住起碼最低限度都有字幕升上嚟，又或者亞視有個logo，話咁多年多謝大家支持，呢個結尾都會好啲，而唔係我都未講完就cut咗，咁樣做一個結尾真係唔開心，真係一個遺憾，永遠都補唔番。佢（亞視）太過份，做嘢真係太唔專業，我明白亞視點解呢幾年會搞成烏煙瘴氣，我個心都成日希望亞視爭氣，點解臨尾都要咁！」對於亞視聲稱會轉戰衞星電視，羅霖說：「我唔會相信佢哋囉，佢哋成日都講大話，呢班人我唔會對佢有信心，乜嘢形式都唔會合作。」
羅霖的「獨立宣言」昨在社交網洗版，有網民指她是「港獨女神」，羅霖昨在電話表示強調網民解讀錯誤：「絕對冇政治立場，我啲朋友都問我，驚唔驚返唔到大陸？我梗係唔驚，我嗰句意思都唔係咁樣。我嗰句係講鼓勵女性任何時刻都經濟獨立，唔好依賴某一方而生活，絕對冇政治立場。」
亞視衰收尾，一眾藝人慘不忍睹，大姐明勞氣說：「由頭到尾都衰！佢貫徹始終！」劉錫賢怒斥亞視做法核突：「好羞家！證明咗一樣嘢，證明呢班高層喺度賴皮緊，因為佢哋一路以嚟，都係做緊賴皮嘅工作，佢明知去到零時零分一定要sharp cut，知道晒手頭上所有嘢，佢喺一個賴皮情況下播乜嘢？係介紹佢跟住一帶一路嘅廣告（指亞視突然加插未來發展訪問節目），然後先播Candy（羅霖）節目，如果你有啲良心就畀我播埋佢呢啲咪一路以嚟賴皮嘅行徑囉！所以佢先至攞『拃』錢出嚟，又唔分畀大家就係咁解！」
■羅霖與劉錫賢等亞視前藝人前晚上《真熄亞視Live》與觀眾道別。
■睇亞視熄機直播的魏秋樺（右）和陳綺明亦為亞視爛尾爆喊。
■蔡國威直斥亞視由頭呃到尾。
袁潔儀：風格似內地袁潔儀亦鬧爆亞視羞家：「點向觀眾交代？呢啲風格就似內地，我哋明明睇緊啲嘢，佢走去sharp cut，我以為睇緊內地電視！」歐錦棠則怒斥亞視羞辱整個行業操守，對觀眾完全有欠尊重。此外，魏秋樺和陳綺明前晚出席有線直播節目時，亦為亞視「突然拔喉」傷心難過，當場落淚。
採訪：戴彩煥、何慧斯、唐如
攝影：陳慧安
|
鍾意就快D Share啦！
|
|
|