港姐出身，做過大台又做過亞視，34歲嘅戚黛黛噚晚同男友喺峇里訂婚，好浪漫!我哋聯絡黛黛，佢開心透露未來老公係副機師，記者讚佢未婚夫夠靚仔，佢話:「我又唔會講靚仔，不過佢幾乖仔，我諗對我嚟講最重要係錫我同錫我啲屋企人，佢同我屋企人都好get along(和睦相處)。」見佢哋喺沙灘上食燭光晚餐，黛黛話:「得我哋兩個咋，唔係訂婚Party，得我哋兩個嚟峇里，係一個surprise，即場求婚，噚晚佢就book咗沙灘食飯囉，沙灘得我哋。」求婚都有蝦碌事，佢話:「原來我噚日戴隻戒指成程都係鬆，佢求婚之後問我戴邊隻手指，我話『唔知喎，我都未結過婚』，最終戴咗第4隻手指，係好鬆嘅，之後俾屋企人睇相後，佢哋話『喂你戴錯手指』，原來戴第3隻手指先啱，所以O依家就啱，我哋戴錯手指，大家都係比較緊張亂籠，幾開心，我O依家就喺峇里，過幾日再返香港。」黛黛話同未婚夫拍咗3年幾拖，大家識咗4年，至於幾時結婚呢?佢話:「未知呀，噚日佢先求婚，所以都要遲啲同屋企人商量，先再訂到個日子結婚，都幾開心o架，我成日覺得佢求婚，我會識穿，同可能普通喺間餐廳食食下飯就求...冇諗過佢會咁浪漫，佢唔係一個浪漫嘅人，所以噚日都幾開心真係，幾surprise佢會諗咁多嘢出嚟。」戚黛黛係2003年度香港小姐季軍，同佢同屆嘅冠軍曹敏莉同亞軍楊洛婷都結晒婚喇!
|
鍾意就快D Share啦！
|
|
|