「秘書王」葉凱茵喪子險死
無綫「秘書王」葉凱茵育有五歲兒子，去年再懷孕佗B仔，原本一切順利，豈料預產期前三星期突感腹痛，原來是得了突發性妊娠毒血症，九個月大的BB胎死腹中。葉凱茵病發引致高血壓，情況一度危殆，雖然最終走出鬼門關，但痛失腹中塊肉的她要靠五歲兒子才能堅強撐下去：「我唔可以冧！」
前落選港姐葉凱茵有無綫「秘書王」之稱，拍劇十多年來演過不少秘書及行政人員角色，包括《樓奴》、《天眼》及《親親我好媽》等。葉凱茵與「舊愛」李思捷拍拖多年分手後，於2009年與圈外人結婚生仔，育有五歲兒子，去年再有喜。第二胎再佗仔的她原本一直佗得順利，沒料一月中離預產期不足三星期卻晴天霹靂，她患突發性妊娠毒血症而感腹痛，可惜去到醫院時，九個月大的胎兒已經沒有心跳，返魂乏術，自己亦一度命懸一線，幸最終無事！
遺憾冇見最後一面
事隔數月，葉凱茵走出傷痛接受訪問憶述慘痛經歷，她眼濕濕說：「依家講起都想喊，但要叫自己忍住，要堅強。上年有咗BB，第二胎一切好正常，政府、私家醫院都有檢查，一切正常。喺1月15日突然個肚唔舒服有啲痛，因為預產期係2月11日，仲以為作動生得，去到醫院醫生話BB已經冇咗心跳、冇得救。醫生要即刻催生佢出嚟，當時自己清醒、好驚、好慌、好亂、好痛！醫生話我係妊娠毒血症，醫生話我執番條命都好好彩，因為病令到血壓好高，當時血壓180幾隨時中風，亦令心、肝、腎都差咗，要慢慢治療，隻眼都有少少黑影。」
匿埋喊疑患情緒病
經歷巨變的葉凱茵靠老公及兒子支持捱過難關：「唔係有老公同個仔，一早已經崩潰，以為自己會患情緒病，姑娘問我睇唔睇個BB，自己覺得好衰拒絕咗，因為擔心呢個畫面會係一世。好遺憾、好矛盾冇見個仔一面，當我自私，唔想留低陰影，仲要照顧個仔，我唔可以冧！其實個心好唔安樂，依家每日同BB祈禱，同佢講對唔住，可能同佢冇緣分，矛盾係BB成咗形、生咗出嚟，但得唔到媽媽懷抱，但已經係事實，冇辦法，為咗個仔一定要堅強。」
BB胎死腹中後，葉凱茵在家休養了兩、三個月，不時匿埋喊，最怕獨處，她說：「有一、兩日喺房突然間覺得好驚，都懷疑自己有驚恐症、情緒病，好彩個仔好活躍成日黐住我，令我分散咗注意力，自己一向好健康。冇諗過咁不幸嘅事會發生喺我身上，好彩自己有乜唔開心會講晒出嚟，慢慢又好番啲。」她特別感激老公悉心照顧：「屋企人支持好重要，老公都好難受，老婆隨時唔得，見到佢咁照顧我，自己更加唔可以諗做傻事。其實我一向都好脆弱，冇諗過可以咁堅強。」
做生意使乜驚！
走出鬼門關的葉凱茵，人生觀也有改變，康復後與朋友合資六位數開設BFC Beauty Fans Channel在網上及旺角售賣美容產品，她說：「以前冇諗過做生意，今次做生意都係因為呢件事，希望個仔將來過得好啲！以前好驚青，依家仲有乜好怕，死都幾乎試過，真係半隻腳……執番條命好好彩，仲有乜嘢需要去驚？」首次做生意的她主要售賣日韓、德國、意大利及新西蘭潮流美容產品。
重投工作後，豁出去的葉凱茵連拍劇也得心應手，最近拍攝劇集《親親我好媽》更獲米雪大讚，她說：「以前好驚，唔知驚乜，依家連死都差啲試過，拍劇做戲感覺都好咗。其實今次講番件事，希望多啲人留意呢個病，呢個病真係太恐怖！有啲人會有先兆，我就冇先兆。」
文：影視組
|
鍾意就快D Share啦！
|
|
|