拆彈組嚟到奧脫福解決炸彈疑雲！(Getty Images)
真相大白喇！尋晚因為一件疑似爆炸品導致曼聯主場對般尼茅夫之戰取消，不過經過大曼徹斯特警方幾小時查探後，終於搵到真相！原來所謂疑似爆炸品，係之前一間私人公司租用奧脫福訓練搜索犬時大意留低，一切只係虛驚一場。至於曼般之戰，英超賽會今晨正式公布，會喺香港時間周二深夜3點舉行，踢埋呢場，「紅魔鬼」先可以專心備戰足總盃決賽！
當地警方今晨引爆咗件疑似爆炸物，然後再反覆調查後公布，原來呢部插上幾支疑似引爆管道嘅手機裝置，其實係日前一間私人公司，喺奧脫福進行涉及搜索犬嘅訓練後，大意留低咗喺費格遜看台5樓男廁其中一格，根本係唔會爆炸嘅模擬裝置，總之就係有驚無險
大家可以鬆一口氣，英超賽會同時亦宣布曼聯對般尼茅夫嘅補賽日子會係周二晚，佢哋仲多謝曼聯職員、警方及參與咗今次緊急事件嘅各單位，喺危急關頭成功處理各項工作，以及為補賽嘅協助。
值得一提，有網友心水清，計好曼聯要爭第4打歐聯，原來仲有機，只要贏般尼茅夫19球就得喎！19球？加油呀！
來源 source: http://hk.on.cc
|
鍾意就快D Share啦！
|
|
|
