Kay心郁郁復出拍續集
謝安琪（Kay）首次演電視劇《殭》昨晚大結局，她相約粉絲聚會捧場並分享演出喜悅。對於演技與造型獲讚，更有不少粉絲支持開續集，令宣布暫別娛圈的Kay亦心郁參演續集「開綠燈」，「殭女神」極有機會再現公仔箱！
謝安琪（Kay）、鄭嘉穎與陳凱琳等主演的話題劇《殭》昨晚大結局，Kay昨日在社交網站邀約一班粉絲聚會睇結局，已宣布暫別演藝圈的她，露面機會買少見少，一眾支持者當然把握與「殭女神」Kay短聚的機會，短短半日已名額爆滿！為答謝劇迷與歌迷熱情支持，Kay與粉絲影合照、簽名無任歡迎。她更於Facebook直播聚會，除了即席清唱，又指揮粉絲玩人浪，Kay笑言是健康聚會：「唔好睇佢哋咁High，呢度絕冇酒精飲品！」Kay數度直播現場情況，到劇集播畢，共吸引逾三萬人次追睇。
最愛孖辮Look
而日前Kay在結局篇中驚見四個不同造型，交代她的角色數百年來的故事，當中有古裝、小鳳仙旗袍Look、民初及未來造型，吸引支持者Cap圖留念，Kay受訪時說：「男主角（鄭嘉穎）都有四個（造型），都好俊俏！呢段係解釋番兩個人有成五百幾年嘅緣分，係好感人嘅。」早已因「超C趕D」豐滿身材成劇集其中一個焦點的Kay，其旗袍造型最受網民熱捧，大讚身材浮凸亦顯成熟韻味，但Kay則鍾情民初Look，她笑說：「好感謝造型組咁認真，呢幾個造型只係出一小段，但大家好認真幫我設計。自己最鍾意紮孖辮民初Look，劇情又同嘉穎隔住牆望同一個月亮，好有意境。」首次拍劇的Kay獲安排四款不同造型，問監製陳維冠是否特別優待她？他笑說：「嘉穎都有四個，呢個係劇情安排。」
提到《殭》結局篇眾多要角先後陣亡，包括人氣高企的陳嘉寶、陳瀅及劉佩玥等，而主角刑活著（鄭嘉穎飾）與藍夢南（謝安琪飾）及藍夢瑤（陳凱琳飾）兩姊妹的三角關係仍未明確交代，結局中三人分隔於現代與未來，最後交代刑活著生存到未來時空與兩姊妹重逢，分別與二人擁抱及拖手，再「三人行」離開。即被劇迷指劇情鋪排為續集埋下伏線，同時有粉絲支持開《殭》劇前傳。
好有滿足感
對於獲支持再拍劇，Kay亦表示有收到粉絲的支持：「估唔到大家真係咁鍾意，好多謝大家鍾意藍夢南呢個角色，收到好多粉絲同朋友支持，佢哋都話想有《殭》第二輯，真係好開心。（演續集？）心郁郁嘅，不過年紀真係大喇，唔知再有冇咁嘅魄力。劇集開頭都承受咗壓力，發現好多人留意我嘅演出，不過去到後面大家咁喜歡，都好有滿足感。依家睇番拍劇嗰陣真係好懷念，有機會都可以再拍，不過唔係短期嘅事，睇吓劇本再決定。」
文：影視組
|
鍾意就快D Share啦！
|
|
|
