現年34歲張栢芝同霆鋒離婚後，電影六連仆慘變票房毒藥，舊年向太冒險搵佢孭飛拍攝《3D封神榜》做哪吒一角，點知開工兩個月，栢芝因為頻頻失場同冇心機拍攝，搞到向氏夫婦最終死心對外宣布「永不錄用」栢芝。雖然事後栢芝補鑊話叫向生向太唔好嬲，不過多年恩情從此了斷。向太今次喺康城接受內地媒體訪問，講到栢芝自認係佢哋個契女，向太就好決絕咁否認：「李連杰和利智的女兒才是我的乾女兒。張栢芝在公司的時候，覺得我們這麼幫她，關心她捧她比她父母還好……或許是那個moment，她真的覺得我們比她爸爸媽媽還好，或者只是哄我們。」向太喺訪問中，仲話自己觀察咗栢芝一年，希望對方可以改掉壞習慣。向太仲提到，03年栢芝拍電影《大隻佬》嗰陣，佢仲激嬲埋出名好脾氣嘅劉華，因為拍戲嗰陣，撞啱栢芝第一次同霆鋒鬧情變，拍拍吓戲，就喺電話度一次過買咗5隻色嘅手袋，華仔事後對向太投訴話：「如果唔係畀面你，真係想當場發作。」其實呢番話，向太於去年3月已經講過0架喇，除咗對栢芝發炮，向太仲有提到多年冤家周星馳，舊事重提當年對方不問自取喺佢屋企拎咗佢8枝紅酒。睇嚟向太對栢芝、星爺嘅心結，今時今日都仲未解得開。
來源 source: http://hk.apple.nextmedia.com
|
鍾意就快D Share啦！
|
|
|
