歌手岑日珈（Angie）今晨在網上透露月前為救4個月大的北京狗仔「麵包」，左手中指慘被另一隻愛犬哥基「笨笨」咬甩一半的指甲和肉，至今晨搬東西時，受傷的指甲再次飛甩，要入院做手術縫4針，可謂禍不單行！
「麵包」慘叫一地血
Angie接受《東網》電話訪問時，提到受傷血案時，仍猶有餘悸。她表示當日早上十一時左右，她在睡房聽到大廳傳來「麵包」一聲慘叫，立刻飛撲出去看發生甚麼事：「當時『麵包』畀『笨笨』咬住，『麵包』隻右眼幾乎甩，成地血，但『笨笨』咬住『麵包』啲手腳死都唔放，我好驚佢會咬埋『麵包』條頸，我要用兩隻手撬開『笨笨』個口，所以佢咬甩我手指甲同冇咗忽肉。」
未知對視力影響
不過Angie未理會自己的傷勢，用紙巾包住手指後，負傷抱起「麵包」飛奔去獸醫診所求醫，獸醫立刻為「麵包」做手術。數小時後，獸醫指幸好「麵包」右眼的神經線沒有被扯甩，可以將牠的右眼移好，但未知能否回復視力。「麵包」於診所住了大半個月，牠接受手術後翌日，Angie曾帶牠回家：「我將佢安放喺我睡房嗰籠入面，因為要將佢隔離，唔好令佢傷口再受損，而且我驚佢會驚『笨笨』，所以要分開佢哋。」
「驚到喊唔出」
今日Angie已正式接了「麵包」回家，她表示「麵包」的表面傷勢已康服得七七八八，但視力仍有待觀察：「佢依家隻眼都唔係好睇到嘢，冇乜反應，但醫生話佢進展良好，再等一個月先知佢視力係點。」憂心的她又指若「麵包」最終確診失明，將要再接受眼球移除手術。而Angie每次想起麵包受傷血淋淋的畫面，都忍不住會打冷震兼想嘔，因為她人生第一次看到這麼多的血，她續說：「當時我驚到喊唔出，淨係諗要救番『麵包』BB先。」
送「笨笨」上堂
她家中共養了五隻愛犬，當時另一西施愛犬也被嚇怕，另外兩隻愛犬則不停吠。Angie認為「笨笨」的社交出現問題，便送牠到訓練學校上堂，她說：「『麵包』出事後，我諗過將『笨笨』送畀人，因為驚唔識教佢，但最終都唔捨得，希望佢上完堂會乖啲，我問過醫生同養開哥基嘅朋友，可能『笨笨』跟狗女玩開，佢唔識同狗仔相處。」
自己指甲再飛甩
今晨Angie的左手中指再度受傷，她指可能因為已受傷的指甲太脆弱，她搬東西時整塊指甲飛甩，當場血流如注，她在凌晨兩時立刻飛車到急症室求診，她說：「醫生話一定要插番指甲入去，否則將來唔會再生，結果縫咗四針，依家麻醉藥過咗，真係好痛，十指痛歸心。」不過為免家人擔心，她待手術完成後才敢告訴父母。
|
鍾意就快D Share啦！
|
|
|
