大台用人唯親，聽教聽話肯簽長約嘅藝人有機受力捧，否則一律擲入雪櫃冇情講。不過今時今日大台呢招高壓政策已經失效，原因係大陸劇需求大，加上有新媒體出現，造就大台唔少有份量嘅花旦，都勇於向外闖。除咗阿佘開製作公司自立門戶，歷代花旦離開大台，都有唔錯嘅發展。胡杏兒：
舊年約滿後唔再續約，結束同大台16年賓主關係，後簽約蕭定一，盛傳以2,400萬簽約三年，轉戰大陸市場同電影，早前接咗杜國威嘅舞台劇《我和春天有個約會》，作多方面發展。同時開設自家品牌婚紗店 「KEVOLIE」，升級為老闆娘兼擔任行政總監。明明已經冇人用，續唔成約但好嚟好去都得㗎！但就傳願意出更高價嘅無綫老闆陳國強覺得被落面，下令要全面封殺杏兒。對此杏兒謂：「TVB有自己政策，呢個我明白亦理解，唔會介意。」陳茵媺：
同陳豪三年抱三嘅陳茵媺，前年以全職照顧小朋友同屋企為由，宣布暫時淡出娛樂圈。舊年7月，陳茵媺同大台約滿，靜悄悄結束9年賓主關係。雖然樂做全職媽咪，不過佢舊年8月一度復出，同杜汶澤合作拍電影《開飯啦》，點知部戲都未拍完，陳茵媺又有咗，今年4月終於生咗佢哋嘅Baby Girl，成功「三年抱三」湊成「好」字。噚晚陳茵媺忽然喺微博留言「在家庭投入家庭…在工作投入工作…請俾啲耐性，我一定會返嚟！Fighting！」人母似乎暗示嚟緊有新搞作。陳法拉：
34歲陳法拉，有指3年前同大台續約嗰陣，唔肯就範加簽長約，最後決定離開大台，隻身飛去美國讀戲劇，最近返港，同男神黃子華合作拍舞台劇《前度》。結果開賣唔夠1粒鐘，21場優先訂購嘅門票就已經售罄，而淘寶網竟然有人開天價8,888人仔兜售，泊住男神碼頭，法拉返港即先聲奪人！徐子珊：
36歲嘅徐子珊，舊年同大台約滿後冇再續約，開展珠寶設計事業。最近子珊終於有去向，佢透露會簽邵氏旗下、王祖藍開設嘅經理人公司，主力拍電影同向大陸發展。楊怡：
同樣都係36歲嘅楊怡，仍是新婚燕爾，今年4月約滿大台，暫時未有新動，依家忙緊籌備婚宴。之前有傳楊怡係想簽部頭，多番啲私人空間，但無綫想佢做親生女加以管束，咁自然傾唔掂啦。回復自由身嘅佢，有指會做跟得夫人，陪老公羅仲謙到北京發展，一直諗住婚後陀B嘅楊怡，應該有短時間會暫別幕前。
|
鍾意就快D Share啦！
|
|
|
