無綫藝人金剛除了在幕前演出，拍電視劇、電影及綜藝飲食節目外，近年亦與友人合資搞生意。上年開始，金剛就先後搞大閘蟹和日本水果生意，現時水果生意相當穩定。如今他又有新搞作，於中環威靈頓街開設Bakery Cafe。
親力親為搵咖啡機
金剛今次投資七位數字，由搵咖啡機、咖啡杯、舖面設計及整咖啡都由他一手一腳去包辦，事事親力親為。金剛坦言：「做藝人好被動，係自己幫自己打算，我依家都35歲，冇時間再玩，要認真為事業打拼，今次搞coffee shop，因為自己都好鍾意飲咖啡，我哋舖頭部咖啡機我都係自己親自去搵，真係不得了，半自動，唔係撳個制就可以，呢部係要手動，咁先有感覺。」金剛坦言最初有咖啡機時，已自己試沖，足足沖了30多杯才似樣，他謂：「我自己鍾意飲濃啲嘅Americano美國咖啡，其實好多人以為飲咖啡唔好、唔健康，其實飲咖啡都好好，咁你如果一日飲十杯梗係唔得，有啲人飲會心跳，呢個只係體質問題，我自己一日最少飲三杯，冇事呀！同埋我唔落糖，不知幾健康。」
融為一體
提到裝修，原來都是金剛的想法，牆上桃紅色的Aloha，更與金剛身上的紋身一樣，金剛解釋謂：「Aloha係夏令一種花，裏面包含了愛、希望、和平嘅意思，人生最緊要嘅三樣嘢，我自己好鍾意。」
加入台灣元素
談到中環都有很多不同類型的Cafe，他的店舖又以甚麼特別吸引顧客時，原來金剛專登從德國、英國搜羅咖啡杯及茶壺，外型美觀，咖啡杯的杯耳更是18K白金製造，相當特別，金剛謂：「我希望顧客入到嚟有唔同嘅感覺，有唔同嘅印象，而且我哋呢度嘅曲奇、甜品同蛋糕由我哋店長Kay親自炮製，嚟緊都會有台灣風味曲奇餅，全部都係真材實料，我自己本身係台灣人，好多嘢會加入台灣元素喺入面，舖頭有一款蛋糕，我喺台灣食過，我鍾意到不得了，跟住我拎番嚟畀Kay試，問佢有冇辦法搞，佢試咗一個星期，就整咗出嚟！而且我都會落場煮嘢，整一啲自己嘅套餐。」
曾被拍檔出賣
此外，說到中環的客路以OL為主時，金剛聞言即謂：「我喺OL界巿場都好大，你都傻，我老少通吃，唔係我食佢哋，係佢哋食我，真係唔擔心，總之全部嘢都要『膠』（高）質素，唔『膠』唔做，總之要『膠』級。」問他會否於台灣開舖時，他坦言做生意絕對不能心急，要慢慢來，他說：「開分店係會，但一步一步嚟！以前自己好急，所以咪瀨嘢，試過喺台灣做服裝生意，有個拍檔有啲問題，捲款而逃，唔見咗六位數字！（之後會否搵圈中人夾份搞？）都會傾，但真係唔想太急。」
唔會搵人着數
說到做藝人做生意有着數時，金剛又謂：「啲人以為明星做生意淨係掛名，係唔得嘅，唔落手落腳冇意思，着數真係冇乜，反而多人同你攞Discount，我唔鍾意佔人便宜，所以唔會搵人着數，反而人哋搵我着數多啲。」
做生意有三大要決
最後，金剛又說到做生意的三大宗旨，他坦言：「第一，要親力親為，唔係真係冇意思，第二，對員工唔好擺架子，要當佢哋係一分子，唔好擺款，一齊做嘢最緊要開心，第三，要令客有感覺，希望佢哋嚟飲咖啡會感到舒服、放鬆。」
Bakery cafe
Boss：金剛
開業時間：2016年4月
開店成本：過百萬元
每月租金：六位數字
店舖面積：700多呎
|
鍾意就快D Share啦！
|
|
|
