有胃口嘅超人李（左），清減咗嘅超人李（右）。
中環人語
超人李何事清減？
超人李四年來首次見外國傳媒。果然有料到——叫事頭婆唔好脫歐，否則會好麻煩。鬼唔知咩，家吓佢鋪頭有近六成利潤來自紅毛國，脫歐有乜三長兩短，你估佢會好盞鬼呀？結果係乜，大家知道啦。班紅毛唔聽超人李支笛，莫非李氏力場去唔到咁遠？
不過佢老人家咁耐冇露面，面口確係清減咗。委員長未落嚟，佢已經放定聲氣話有腸胃炎。等人唔好以為佢刻意避席唔俾面。點知委員長返咗歸啦，佢嘅腸胃炎都仲未好番。醫學昌明，冇理由拖得咁長手尾㗎？佢清減成咁嘅樣，睇嚟真係冇胃口。莫非天口㷫？冇理由吖，有冷氣㗎噃。
中環寸嘴：有汗水、淚水、血水，冇奶水
工廈大王楊耀松長子，游走高級酒店、銀行，及知名食肆，與各路人士打交道，自認有 jet set生活方式，透過美酒佳餚，察看人生百態，把「生平絕學」不吐不快與粉絲分享。
我以前成日講：「啲嘢咁容易俾你估到，就個個變晒李嘉誠喇！」英國脫歐，個老友窒鬼我，叫我以後要改口，呢鋪連李嘉誠都估唔到呀！今次班銀行佬個個驚到標尿，恒指跌至 18000點，往時就叫我搬定多啲錢去補倉，今次歐洲佬唔識救市，可能跌到無底深潭，班友講都唔敢講！唉，你睇 Barclays股價喺倫敦跌到停板，之前私人銀行賣埋俾新加坡佬，喺香港 Barclays都冇乜嘢剩，好彩之前向銀行佬「班」多幾個 Barclays 325周年紀念環保袋，真係三百幾年嘅光輝日子，往事只能回味。
李嘉誠都算係唯一去海外投資有啲成績嘅「人辦」，一帶一路喎，如果係好 project，未出街已俾人擸晒啦，仲等得切坐私人飛機去考察呀，都係留港建港最實際，想當年我都做咗一帶一路海外投資嘅炮灰，有汗水、淚水、血水，我唔係女人咋，如果唔係奶水都要泵埋出嚟，死鬼老豆仲怪我引導佢投資外國，差啲連佢工廈大王個徽號都保唔住，所以千祈唔好叫我做工廈大王二世，如果唔係就前世唔修，我只能受得起工廈小王子—— princeling呢個朵，繼承咗工廈大王嘅「食邑」。
「補白」，上個禮拜我話做嘢要慳慳哋，但係又要有 flying colours，而唔係 fly colours，手民之誤，老友都估我啲英文應該冇咁水皮呀。
香港仲有言論自由
官家嘅 2015《香港年鑑》新鮮出爐。揭開第一頁嘅「大事剪影」，映入眼簾，赫然係香港國際機場。機場發生咗啲乜嘢大事？你懂的。
更加頂癮者，係同呢張機場大相打對面，並非別的，正是代表法治之終審庭大樓嘅士擔細相。年鑑老總想表達啲乜，唔使畫公仔畫出腸啦啩。過渡就嚟廿年，好彩香港仲有言論自由。些少咁多啦。
蓮香樓傾租有法
自九六年搬到中環威靈頓街的蓮香樓，一直租用曾昭灝大廈地下及一樓，兩層茶樓租金多年來是四十多萬左右；但近日傳出蓮香樓不獲續租要結業；原來今年初資本策略主席鍾楚義以一億五千三百萬向蓮香樓業主曾氏後人購入鋪位；嘩，以舊租金計，回報率唔夠 0.3釐，唔啱數，唔提加租就假啦，因而傳出蓮香樓不獲續租，其實呢啲都係業主同租客「鬥拋」嘅板斧。中環周大福未同長實續租前都放聲氣搬，士丹利街嘅新同樂酒家近排都話要搬，不過據老茶客講，蓮香樓已續租，業主俾佢做多一年半，如果鍾楚義有意向樓上單位收購，以統一整幢業權再重建都頗花時間，咁又唔急於趕走蓮香樓嘅。
|
鍾意就快D Share啦！
|
|
|