熱爆娛樂: 【獨家專訪】18歲原島大地日子點樣過？單身筍盤公開擇偶條件 _

2016年6月8日星期三

【獨家專訪】18歲原島大地日子點樣過？單身筍盤公開擇偶條件 __,原島大地,

其他影片：>>

近期熱話梗係離唔開NBA總決賽勇士大戰騎士，拍過《忘不了》嘅童星原島大地，大家都喺金像獎見過佢有幾咁靚仔㗎啦，「樂樂」家陣大個仔喇，又型又潮嘅佢點會冇睇NBA，佢仲話全力支持勇士添。原島大地日前秘密來港工作數天，百忙中不忘為《蘋果》獨家拍攝專訪。自認係勇士粉絲嘅大地，特別穿起咖喱仔史堤芬居里30號波衫，仲喺球場遇上宿敵占屎哥（CK飾）：「呢期興我咖喱仔呀，日式咖喱呀，睇我表演」果然，插花技術出色嘅大地完勝對手，輕鬆K.O.占屎哥。今年18歲的原島大地，父親係日本人、母親係日藉華人。喺日本出生嘅大地，小時候隨母親去廣州生活，大約4年前才返回日本居住，依家喺東京讀高中。兩個月前，原島大地現身金像獎頒獎典禮，雖然佢只係閃現10秒左右，已引得網民熱淚盈眶，仲封佢做新一代男神，又瘋狂轉貼佢嘅相，掀起一陣大地熱！大地被問到「男神」呢個稱號，即怕怕醜醜，謙遜謂不敢當：「我唔知自己係咪乎合做男神嘅資格喎！」問其心目中男神人選，大地話係劉德華：「心目中嘅男神係要有氣質，大方得體，對事業、家庭同女仔都要認真，劉德華就乎合晒呢啲條件。事業上我都希望以佢為目標。」至於女神，大地鍾情林嘉欣，仲自爆睇完佢同張國榮拍《異度空間》就開始欣賞佢，所以兩個月前喺金像獎有機會同嘉欣合照，十分開心。大地由02年就開始拍戲，喺香港同內地拍過嘅電影有10幾部，不過最令人印象深刻，一定係睇過就喊過嘅《忘不了》，尤其張栢芝拖住飾演樂樂嘅大地去保良局，大地喊晒口叫栢芝唔好唔要佢嗰一幕，嘩，洋蔥到爆呀！今日嘅大地，喺東京讀書，已經係高中生，唔再係當年嘅樂樂。問佢有冇興趣再拍戲？大地承認有興趣：「如果有機會，都想返香港拍下戲，但係目前一定以學業為重，我都希望可以考入大學，讀多3、4年書。」有指好多人都想知佢嘅近況，大地就話：「我依家嘅生活好普通，我同千千萬萬嘅學生一樣，平時就係讀書、打波，坐地鐵返屋企食飯。」問已經脫離童星行列嘅大地，可擔心再拍電影要面對娛樂圈唔同嘅新聞，大地就冇有怕：「平常心面對我暫時嚟講係冇嘢唔可以俾人知嘅！」就連戀情都唔怕被追問？依家有冇拍拖？大地即笑住話：「冇呀，冇拍拖呀，暫時都冇打算追女仔。」咁小男神嘅擇偶條件又係點？大地話首先一定要孝順，至於其他要求，大地就話好簡單：「最緊要性格大方、有氣質，乜嘢國籍都唔重要，但要合眼緣。」另外，大地透露佢今個月尾會再嚟香港出席天梭表同NBA合作嘅腕錶活動，好鍾意打籃球嘅大地話佢偶像係勇士嘅史提芬居里（Stephen Curry），除咗因為Stephen Curry好波，大地話覺得佢對家庭同兩個囡囡都好好，所以好欣賞佢。採訪：小米　攝影：陳志嵐

	童年版原島大地喺《忘不了》中極度可愛。	「樂樂」被栢芝送去保良局，七情上面演技十足。
早前大地喺金像獎再度亮相，靚仔樣令網民大嗌「小鮮肉」。	大地自爆心目中嘅女神係林嘉欣。	大地日前穿起居里波衫晒球技。
控波技術一流。	球場遇上大敵占屎哥，梗係要挑機。	嚟自日本嘅大地堪稱「日式咖喱」。
大地諗緊點樣擺脫對手。	占屎哥防守脆弱，大地兩三下功夫話過就過。	「日式咖喱」遠射3分都射死你！
樣靚球技精，唔怪得大把女粉絲。	「左手只係扶助。」射波姿態一流。	控住籃球擺pose冇難度。
綁鞋帶都型過人。