「香香公主」岑麗香今日就接受咗《東網巨星》同《東網》fb嘅直播訪問，仲同大家開心分享咗好多好多秘密同秘訣。如果大家願意花半個鐘左右去睇呢個直播嘅話，就會發現香香原來真係真係好可愛，佢嘅口頭禪係anyway，而佢嘅死穴就係男友！唔好講咁多喇，呢個時候，先睇吓呢個直播嘅文字精華，睇完包你忍唔住直刻撳入《東網巨星》同《東網》fb度睇原片。
勁擦得
記：好多人問你幾時結婚喎
香：我今日唔答得唔得呀？
記：好多人話你瘦咗
香：係呀，少少呀！多謝留意，不過唔係刻意嘅，刻意減肥好辛苦，亦都會畀到自己壓力，好似食多啖飯都過份咁，我又覺得唔係呀，想食碗飯好正常，所以我覺得唔應該畀自己壓力減肥，應該感恩有得食，咁份人輕鬆啲，減肥都易啲。
我平時好大食，喺呢個時候，我最想食兩樣嘢，想食好大碟嘅千層意粉，有菜、有肉、有番茄醬、有菠菜嗰隻，我又想食個蛋撻，香港特色嘛。喺溫哥華時，我已經好鍾意食千層意粉，意粉係我其中最鍾意食嘅嘢，蛋撻都係我由細食到大嘅嘢。而我食呢啲甜品嘅時候，我一定要飲奶，我先覺得圓滿。
戒食消夜
香：其實減肥方法好個人嘅，我覺得早啲食飯，真係有用嘅，如果我（夜晚）六點食飯，咁我未瞓覺㗎嘛，咁我可以執吓嘢，逛吓商場、買吓家用品，係咪叫家用品，定日用品？要行路，要運動，可以幫助消耗卡路里。
有時開工，成夜晚九點、十點先返到屋企，咁我食完飯就會瞓，因為想瞓，咁就變咗會肥咯，所以我覺得早啲食飯有用。我如果最早係夜晚六點食晚飯，唔會太早，否則會肚餓。我盡量唔食消夜，如果食都係食唔肥嘅嘢，例如一杯乳酪、或者一杯奶，當然如果拍緊嘢，成凌晨兩、三點嘅時候，公司小食檔又仲開緊，我都會食糯米雞或者食個麵。修哥（胡楓）其實有個秘訣，佢話食完澱粉一定唔好坐低，一定要行，否則即坐會有肚腩。
記：大家都好留意你啱啱尋日出街嘅節目（《乜都攪掂晒》）
香：好冇睇先？點解未有答案嘅，好開心大家有留意呢個節目，我哋有個口號，就係節目名喇。（此時香香即做出招牌口號手勢，仲教巴打絲打應該點做，勁可愛。）我有個角色叫香香老師，唔知點解搵個中文最渣嗰個，去解釋科學嘅原理，不過我都開心，可以叻番次，但啲稿真係幾難背。
勁驚小強
香：驚唔驚小強？驚嘅，好驚添！溫哥華蜘蛛多，所以我細個見過好多好多蜘蛛，小強冇咁多，但我又覺得好恐怖，尤其可以飛嗰啲，點解一隻小強要飛？你行嚟行去跳嚟跳去咪夠咯，做咩咁貪心啫。我平時一見到喺地下都會嗌，因為覺得真係核突，有次喺屋企見到好細隻，好驚，但當時得我一個，所以一定要諗辦法處理，一定要殺咗佢。（呢個時候，香香公主做出say sorry手勢兼猛講對唔住，勁可愛）我就拎起本雜誌，我覺得好有成功感，大力殺咗佢，不過呢度先係最衰格，嗰本雜誌係我做封面嘅，寫緊我啲衰嘢，所以我用佢嚟打小強。
落力敷Mask
香：我哋化妝化好耐，好易乾，所以要保養，否則好快老，我收工會即落妝，有時間就敷mask，有時我會用天然嘢自己整mask，我覺得唔一定要貴，但要勤力同密。之後再搽保養品。
記：有冇幫男友做facial？
香：又問男友？想訪問我定訪問佢？
我想問番，你哋鍾意我拍劇定綜藝節目，我做綜藝節目少啲。
記：大部分人鍾意你拍劇，仲問你幾時再同鍾嘉欣合作。
香：我都好想，呢個係咪陰我㗎？想我答嘉欣幾時返嚟香港？嗰時拍《華麗轉身》，第一次同嘉欣合作，嗰次仲有王君馨，但冇乜機會同場合作，對手戲冇乜，我都希望同佢哋有對手戲，應該會有火花同默契，不過就算拍唔到劇，上綜藝都ok。
牙膏醫暗瘡
香：多唔多暗瘡？我幸運地算少，但大壓力時會有，當我有暗瘡，我嘅秘訣係牙膏，白牙膏，不是gel狀的，唧啲落手指，搽落去，跟住瞓覺，我畀人話過唔work，因為唔科學，但我覺得真係work，一個新暗瘡通常會又腫又fresh，咁樣形容暗瘡好核突呀呵，牙膏會令暗瘡乾啲，會快啲好。
記：網民問你點樣瘦面
香：呢個最後，亦係我最勁嘅秘訣，上星期有報道話我入行後瘦咗好多，我心諗係咩？但我睇完啲相都覺得係，我入行時圓啲水腫啲，我點樣依家瘦啲呢，其實我做咗五年功夫，我鍾意用碌碌棒，木或者磁石我都試勻晒，化妝前我都會用少少時間按摩吓，通吓輪廓位嘅淋巴，幾乎每日做一次，五年後就會見到效果，按摩之前要搽護膚品。
《東網巨星》fb連結：
https://www.facebook.com/onccstars
《東網》fb連結
https://www.facebook.com/onccnews
|
鍾意就快D Share啦！
|
|
|