DJ利嘉兒（Lily）六年前下嫁做製衣及門鎖有錢商人Bong，揸名車住豪宅的Lily一向着重環保，她認為只要是能力範圍之內都會做，她說：「開少啲冷氣、燈，而車對地球環境破壞影響好大，從車着手都係好事。」
老公係愛車之人
講到車，Lily即刻滔滔不絕，全因她老公是愛車之人，她更以女人愛換手袋、換新鞋，形容老公對車的熱愛程度。早前她以110萬港元買了近年流行潮物Tesla Model S電動車，她說：「市場有咩新款老公就會八卦，身邊朋友大讚架車好，所以就買咗，揸咗之後，比預期優點多好多，電車係大趨勢，既環保又IN，起步嘅爆發力好勁，可媲美好多超級跑車，好快、有貼背嘅感覺。」
大讚人工智能
身為DJ的Lily熱愛音樂，對於這架電動車最令她滿意的地方就是音樂，她表示：「架車本身內置已儲存咗好多歌，歐美中日韓等多個地方，而且任何類型都有，全部仔細分類好，好正。而且個Mon有ipad咁大，GPS又好準，睇導航好清楚。」既是環保車，不需要入油，當然節省不少，她說：「架車平時老公揸多，以前佢每個月八、九千蚊（港元）油錢，依家佢喺公司安咗個叉電器，每月電費都係多六、七百蚊（港元），慳咗九成幾。（叉電會否麻煩？）如果自己屋企冇安裝叉電器，平時要到有叉電嘅停車場，就要排隊，唔係好多停車場，因為仲係新，希望嚟緊會有多啲地方可以叉。」Lily又大讚架車有人工智能，跟車太貼會有提示，又有行車記錄：「架車會記憶你成日去嘅地方，如果經過啲路有Block位，車頭會自己升降避震，有晒感應，仲有一樣好處，就係自動駕駛，但香港就唔用得，喺外國High Way用就會好正。」
嘆外型美中不足
Lily認為此車美中不足是外型：「外型似房車又有啲似跑車，唔湯唔水，所以我哋想佢靚仔啲，將啲銀色部分都轉晒黑色，有啲與眾不同，架車原定七十幾萬港元，因為加咗天窗，加大碼力轉咗外型嘅色，所以要110萬港元。」她亦十分留意環保車的新動向，知道將推出車身較細的Model 3，她已急不及待落訂買了兩架：「Model 3我哋已預計咗兩部，好啱女仔揸，架車細啲，好靚，價錢比較平，暫時公布價錢30萬港元，但未知要唔要稅，因為依家電車至2017年都唔使稅，而架車要2018年先有貨到。」
|
鍾意就快D Share啦！
|
|
|