周潤發所到之處，只要他金口一開，任何場合都可以即時滿載笑聲。雖然幽默風趣形象早已深入人心，但他謙稱若要搞棟篤笑，自己一定輸給黃子華。對於子華暗示「香港已經令佢笑唔出」，發哥要隔空為對方打氣！
發哥在影壇成就有目共睹，他主演的《寒戰2》於香港繼續創佳績，截至7月13日累計票房達3,100萬港元，成為史上第二快速破3千萬的華語電影。而發哥一向予人幽默風趣的形象，每每簡單幾句說話，即可引得哄堂大笑。於片場常玩棟篤笑的他，謙稱無意搞talk騷：「做棟篤笑你邊好笑過黃子華？佢諗到頭都爆埋，去諗啲嘢引你哋笑，我就喺度we we wet wet，諗到咩講咩，佢哋好笑啲。我哋係畀啲氣氛、正能量，咁對人又好，喺拍戲現場又好，整件事就和諧啲、美好啲。我做人宗旨係總之我去到每一個地方都要係好和諧嘅地方，個氣氛要好好，尤其是拍戲，我更加要個現場好似一家人咁樣，去到邊度做嘢我都係抱住咁嘅心態。如果少啲怨氣嘅話，世界更加美麗㗎！」
「過咗嘅嘢唔好回頭睇」
發哥坦言欣賞子華，但得聞對方早前暗示「香港已經令佢笑唔出」，發哥不忘勉勵子華：「香港笑唔出啫，你可以笑得出嘛，有句嘢話：『開心一日，唔開心又一日』，如果大家都攬住一齊（咁諗），死人喎！唔得喎！我哋一定要向前看，過咗嘅嘢你唔好回頭睇，因為人生短短幾廿年之嘛，所以每天起身都係美好嘅明天，唔需要抱啲咁嘅心態嘅。黃子華！你係我好鍾意嘅人嚟，同埋好欣賞嘅演員。其實子華就應該係一個香港嘅代表，又能文又能武，依家仲做埋舞台劇，更加無得頂添係啦，場場都爆晒，我有機會一定嚟睇你，黃子華，你好嘢！」
輕狂歲月：入咗訓練班
發哥主張做人要向前看，現年61歲的他，正處於世界衞生組織定義的「青年人」組別（18至65歲），回顧這段青年歲月最年少輕狂的一件事，他不作他想即說：「得一件事啫，就係入咗訓練班，做咗個演員，咁就改變咗一生。每一個角色，生過又死過，又同好多人喺埋一齊，又生離死別過，其實我覺得呢個係幾得意嘅人生嚟。因為人係得一生，但係演員就好多生，每一個角色都係一生嘅時候，演咗100套戲，我就過咗100段人生。」
|
鍾意就快D Share啦！
|
|
|