周潤發近年積極回歸華語影壇，拍下多部票房以億元計的電影，當中在新片中對着梁家輝怒吼：「我下半世乜都唔做，淨係招呼你一個。」一幕，令觀眾充分感受到其神級演技與壓台功架！不過，發哥透露下半年暫不接戲，會放一個悠長假期，究竟誰是他「下半年乜都唔做，淨係招呼你一個」的對象？
周潤發近年積極回歸華語影壇，拍下多部口碑之作，最近在新片《寒戰2》中暫時放下喜劇細胞，再展其神級演技，造就電影上映短短兩天，香港累積票房已有2,190萬港元，周六單日更大收756萬港元，打破2004年周星馳電影《功夫》單日所創下的721萬港元票房成績，刷新「歷年香港及華語影片最高單日票房紀錄」！
賞秋色 機票都慳番！
不過，發哥卻透露下半年暫不接戲：「咁又唔係唔拍戲嘅，係冇劇本畀我，有劇本睇咗，真係鍾意嘅都可以叫佢出年拍，如果佢想我去做嘅話！又唔係話唔做，但我今年想去『達標』，達標係咩呢？希望再Fit啲，身體更好啲，因為我夏天訓練咗一輪後，等緊冬天來臨就上山遊山玩水，想呢幾個月遊晒香港嘅名山名水！香港秋冬景色實在太靚，上到山賞心悅目，秋涼上山係好舒服！雖然秋色當然冇去日本睇紅葉咁靚，但其實香港本土嘅山入面啲黃葉、紅葉都可以睇，同埋你去呢啲地方唔使坐飛機，可以揸車或者搭車去。香港郊野公園喺市區裏面，坐車唔會超過45分鐘，分分鐘你屋企側邊有郊野公園，你行上山就得，係方便嘅！所以我好珍惜每年秋冬兩季，邊度都唔想去，就係想喺香港！」
健康用晒就冇貨
現年61歲的發哥在18歲入行，展開逾40載的銀色旅途，已透支的他坦言需要好好回饋身體：「我嘅人生座右銘係開心、快樂同埋健康，有好嘅身體先可以享受到人生，健康等於一切！舊時你可能要供樓、搵食，我就好好彩，到依家可以有咁嘅機會照顧到身體，我透支咗好多，依家有機會就回饋畀身體。有時身體透支得太多，用晒就冇貨返，所以一定要小心，相信依家大家都好注重健康意識，係好緊要嘅！我每日都做運動，但做嘅時間唔係好長，行半個鐘、跑半個鐘，做啲肌肉運動訓練等膝頭有番啲力，咁就唔使成日篤吓篤吓（拐杖）！」
後記：Keep Moving
發哥對運動充滿熱忱，即使出埠工作仍安排時間每天做運動，返到「半個鄉下」新加坡亦不例外，上午跑完水塘，下午接受專訪時精神抖擻，是「運動好處多」的最有力證明！
完成訪問後，發哥分享個人跑步心得，除了即場點擊數個熱愛觀看的網絡跑步Channel外，又親自示範正確跑姿，由運動力學講到近日躍躍欲試的赤腳跑（Barefoot Running），正如發哥所言：「要健康就一定要勤力做運動，呢個係公平交易，都唔係犧牲嘅，你喺運動當中都有樂趣嘛，只要做過就會開心！」聽過發哥此番話後，小記是時候穿上跑鞋，同各位講拜拜！
|
鍾意就快D Share啦！
|
|
|