石修個仔陳宇琛喺倫敦成功求婚，同拍拖兩年嘅有線前主播Camille Lam拉埋天窗。石仔話plan咗一排，佢話﹕「自從我前年去過呢個地方，就覺得我一定要喺呢個地方向佢求婚，早兩個月做咗好多安排。」陳宇琛又話最緊要就係求婚戒指，由搵石到設計都花咗唔少時間，又要唔俾得女友知。佢話﹕「因為o依家一齊做嘢，佢又喺製作公司幫我手。差唔多日日都會對住大家，我要好秘密咁走出去話見客，佢都覺得我嗰排好古怪，我都要諗好多藉口，後尾去到倫敦見我屋企人我諗佢都估到啲，不過係唔知我幾時行動啫。」佢又表示﹕「去大教堂都有意思嘅，大家都係基督徒，要搵一個最勁嘅見證人，就係神，去見證我對佢嘅一個承諾。當時好緊張，本來個腦諗咗好多嘢要講，不過當時啲嘢都亂晒，上台表演都冇咁緊張。佢覺得我好搞笑，佢知我好真心對佢講愛的宣言，佢緊係應承啦，不過大家嘅心情都好亂，又緊張又excited。」陳宇琛解釋絕對唔係奉子成婚，之前已經有計劃結婚，預出年搞婚禮。
來源 source: http://hk.apple.nextmedia.com
|
鍾意就快D Share啦！
|
|
|