（右） Tanya通常去 Zara買衫，但選舉唔講得笑，呢條 Reiss連身裙埋單二千蚊。
（左）王維基一次過掃咗九件法國品牌 Maison Kitsuné白恤衫，埋單差唔多成萬蚊，打中產票都係要有付出。（莫智謙攝）
眾人諸事
王維基撐網購 一萬蚊掃九件選舉戰衣
免費電視牌照未申請到，香港電視主席王維基搞咗個 HKTV Mall做網購，佢真係身體力行，支持網購㗎。話說佢參加立法會港島區選舉，落街站同出席論壇都係著住法國品牌 Maison Kitsuné白恤衫，的確係好醒神。
呢件衫喺香港賣成二千幾蚊，不過網購唔使咁貴，王維基上星期同對手之一公民黨陳淑莊接受本刊訪問時講起，原來佢喺英國網站 MR PORTER買，原價一百二十五英鎊，呢期英鎊匯價跌咗，兌番港紙約一千二百五十幾蚊，當時做緊減價，佢用七五折購買，一掃就掃咗九件，計番港紙，唔過一萬蚊。
呢期同樣鍾意著白色服裝出場嘅陳淑莊就話，佢件戰衣落重本，係英國品牌 Reiss嘅連身裙，賣成二千蚊。不過佢衣櫃最多就係西班牙品牌 Zara嘅衫同裙，每件五百蚊左右。唔好睇小 Zara，由 OL到英國王妃 Kate Middleton都著，好親民。所以話呢，貪靚嘅嘢，都冇分男女嘅，不過 no money no talk咁解囉。
黃梓謙唔認保皇 支持林鄭選特首
本刊上期報導選舉新聞，一時大意將港島區候選人民主思路黃梓謙（ Gary）同漢語聖經協會前總幹事沈志超嘅相片掉轉咗， Gary喺 facebook即刻澄清。查實 Gary係三十三歲後生仔，同六十四歲沈志超個樣又真係好大分別。
佢喺港大讀完翻譯，去咗英國讀法律同埋國際關係，一三年返香港，透過大律師公會主席譚允芝識咗湯家驊，仲加入埋民主思路做理事。 Gary依家係葉氏化工旗下紫荊花塗料集團工程副總監，有網民質疑過佢係隱形建制派，佢話唔支持八三一框架下嘅所謂普選，又話就算做唔到議員，都未係時候加入政府，因為都要睇吓邊個做特首。佢認為葉劉淑儀一定唔得；財爺曾俊華可以團結到社會，但敏感議題上太錫身；林鄭月娥有多啲 vision；曾鈺成有才華但佢有民建聯背景，唔知有幾幫香港人。咁余若薇呢？「唔好喇，佢身體唔太好，退咗休唔喺前線，同埋佢唔係好團結到非泛民嘅人。」
689生日收貴價蛋糕 防賄條例管唔到
上星期五 689喺社交網站貼出一張蛋糕相，話生日「是想念父母的日子」，又話「感謝同事們的蛋糕，感謝市民拍攝、在網上傳播的短片，感謝大家電郵和短訊傳來的美意」。
不過，張相嘅重點係，呢個蛋糕唔平，係高級意式餅店 COVA出品，一磅起錶價係三百六十蚊， 689示眾個餅，點睇都最少兩磅，過七百蚊是必然。心水清嘅讀者會問，公務員可以收咁貴嘅禮物咩？睇番前特首曾蔭權頒布嘅《接受利益（行政長官許可）公告》，訂明人員可以喺生日場合接受私交友好或一般人士三千蚊或千五蚊上限嘅禮物，似乎梁振英冇犯規，但《公告》講明，「給予利益者並非該人員的下屬」同「給予利益者與該人員所任職的部門並無公事往來」，但喺語言偽術橫行嘅年代，呢班同事唔係特區首長嘅下屬又有乜咁出奇？
更更更重要嘅係，曾蔭權當年被指涉貪，由終審法院前首席法官李國能領導嘅檢討委員會，事後建議將《防止賄賂條例》適用範圍擴大至特首，但梁振英一直拒絕落實，換言之，就算梁振英生日公然再收受外國企業五千萬元，其實都冇咩問題，所以佢生日大家梗係嬲嬲豬
何君堯平反六四 先等中共公開歷史文件
今期本刊搵咗何君堯嚟做選舉搏擊，記者搵資料見到何君堯話中共喺「六四」事件上面「犧牲一條生命都係錯」，貴為西環契仔居然咁夠膽，記者趁機問佢係咪會入立法會爭取平反六四。佢話學生有兩點佢一定贊同：「第一，佢係愛國，希望國家富強。第二，要肅貪，政府要清廉。呢兩樣嘢點解唔可以為佢……佢哋去爭取呢一個""呢一個平反呢？」
何君堯聲稱言出必行，一定會喺立法會提出。正當記者以為佢真係咁夠薑之際，佢立即戴番頭盔，原來佢口中嘅「平反」，中共係唔使道歉認錯嘅，要等中共公開歷史文件，再等佢研究埋有冇其他政治因素，先可以斷定喎，「我唔能夠輕率地要人哋做呢樣……道歉或者嗰樣道歉，未有研究，唔能夠出聲。」頭盔呢啲嘢，壹仔識條鐵咩，大家都係留名等睇走數
撰文：巫不言
news@nextdigital.com.hk
|
鍾意就快D Share啦！
|
|
|