探熱針
姣掂陸佑後人陸恭和 偷懶苟芸慧被踢出點心店
前年甲狀腺出事後，苟芸慧受病情困擾接近半停工，事業停滯不前， 33歲的苟姑娘開始為自己將來着急，主動出擊多時，近日終於發市，姣掂有米陸佑後人陸恭和。
據了解，去年自爆有份做連鎖點心店老闆的苟芸慧，近月來因為顧住 mark實筍盤，連由她負責 po相推廣宣傳的簡單工作，亦置之不顧，懶散又零貢獻，最終被大股東踢出局。
賽車結緣
工作量買少見少，大把時間拍拖的苟芸慧，日前被發現有司機揸 Benz接送到銅鑼灣「濕平」，在百德新街附近一帶巡完一圈，已經黃昏七點，負責接載她的 Benz校啱時間，停在 HMV門口，讓苟姑娘上車。
不過，當日管接管送苟姑娘的柴可夫，並非普通司機，而是富貴生意人陸佑後人陸恭和。據了解，二人由朋友介紹認識後，心急搵碼頭的苟姑娘隨即主動出招勁 mark實。
前度有已為人妻的官恩娜和應采兒的陸恭和，向來愛與圈中女星交往，進取的苟姑娘雖然肥咗啲，但樣靚加上性格溫柔，對仍是單身的他，一樣有吸引力。自今年初，陸恭和開始經常帶朋友幫襯苟姑娘的點心店，由於二人同愛賽車有偈傾，來往亦變得頻密。
苟姑娘上車後，因為發現有記者跟住，原該和苟姑娘有下場的陸恭和，即開行 turbo，左穿右插直奔紅隧過九龍，在尖沙咀 The ONE停低車，陸恭和九秒九戴上黑超，等苟姑娘落車後，即踩行油開車走。
走後門鬆人
入夜仍然戴住黑超的苟姑娘逕自走入商場，記者問她是否返點心店巡鋪，她說：「你哋（指記者）咁好嘅，陪我返工。」但她卻過門不入點心店，反而走入對面的時裝店，跟店員搭住膊頭傾了一陣，苟姑娘便走後門鬆人。
「其實苟姑娘唔係點心店老闆，只係同 Qinnie（陳君宜）熟，好好姊妹，呢兩年因為病冇嘢做，佢成日喺 Qinnie面前呻自己冇收入；所以埋班搞點心店嗰陣， Qinnie特登搵啲位俾佢賺啲錢，苟姑娘唔使攞錢出嚟，只係幫手宣傳，喺 ig放相做訪問幫鋪頭做推廣。
「舊年佢同莊思敏鬧晒交，苟姑娘話自己係股東，莊思敏又話唔知佢有份，最後都係 Qinnie出面㩒住，佢唔想影響食肆形象，所以出聲勸大家一齊收聲。」知情者說。
亂放電惹投訴
Mark到有米體貼的陸恭和後，恃住有筍盤揸手，苟姑娘開始對點心店的工作懶懶閒，三月開過 po幫鋪頭宣傳蛋黃哥後，便一直未有其他 po。
「其實幾個月前 Qinnie已經放棄，因為每次叫親苟姑娘幫手 po嘢，佢完全唔理又唔做， Qinnie自己係大股東之一，但一場朋友，佢都冇點投訴。不過有班有米生意朋友，佢哋啲老婆就好有意見，鬼咩！苟姑娘識咗 Qinnie班朋友後，都唔理對方有老婆定單身，都係咁放電，搞到班阿太驚晒！ Qinnie而家都好少約佢同呢班朋友一齊玩，免得惹麻煩。」知情者說。
邊個係老闆
去年中，苟芸慧自稱是好友、前名模陳君宜有份佔大股的「點心代表」餐廳股東之一，又經常被拍到巡鋪和落手招呼客人，但之後卻遭到餐廳另一老闆，投資了七位數的莊思敏公開質疑。事後苟芸慧稱自己是九月入股，但唔係佔大股，只想合作唔想有是非，又強調合作愉快，但之後二人仍隔空互寸，最終要陳君宜出手擺平。
心急上岸
瘦唔番的苟芸慧，近年對演藝工作懶懶閒，但對搵歸宿就好上心，更會勇猛出擊，鎖正目標亦是城中筍盤；但送上門唔吃香，十居其九食白果。
撰文、攝影、攝錄：娛樂組
|
鍾意就快D Share啦！
|
|
|