今次真係抽水抽着火水！話說尋日畀人踢爆佢慶祝奧運奪3金兼30歲生日，就去同個20歲巴西女學生Jady尋開心，赤裸上身影埋性感床照。本來件事通咗天，最多咪畀未婚妻扭吓耳仔，鬧多幾句咪乜事都冇點知多份傳媒隨後就為呢位學生妹大起底，發現原來佢身份神秘，點知學生妹咁簡單！
據知，原來阿Jady係個巴西貧民窟毒梟嘅女友，即係「阿嫂」咪以為佢個男友杜格拉斯彭利拿係個二打六小頭目，查實佢係案底纍纍，殺人、勒索、虐打乜都有，仲有十幾個社團一直想做低佢。仲精彩嘅係，原來呢位杜格拉斯彭利拿，竟然喺今年3月一次同當地警方嘅槍戰中，畀警察開槍打死咗，即係話Jady直頭係個「江湖大嫂」黑寡婦，真係有毒，埋身隨時死得人呀！
雖然事後身為兩子之母嘅Jady受訪就玩低調，唔想身份曝光，怕愈搞愈麻煩。不過保特似乎都心知不妙，怕有手尾跟，尋日當件事通天，佢原定會去出席閉幕禮嘅安排都決定臨時取消，提早飛去英國，之後搞乜，暫時就未有人知，但點睇都係「着草」味道極濃囉！
仲有，有狗仔隊仲影到保特天光去到里約熱內盧夜店認識Jady之前，原來仲去咗其他地方蒲，先後同個金髮女子激吻，及同個黑人女子大跳辣身舞，有傳媒就串佢喺田徑場贏完3金，去到夜店都嚟個連中三元添，唔知保特聽到，仲識唔識得笑呢？
SO東波同你追實體壇每個精彩時刻！
http://on.fb.me/1PWMCFH
來源 source: http://hk.on.cc
|
鍾意就快D Share啦！
|
|
|
