馮盈盈變爆粗港姐認年少無知
出爐港姐馮盈盈憑標致外貌及談吐得體而贏得后冠，但隨即被揭兩年前在佔領運動期間曾在社交平台連環爆粗，並多次發表激烈言論，想不到外表斯文的她原來是「小辣椒」！盈盈昨日出席活動時直認曾爆粗，自言當時年少無知。而她的十優醫生男友繼續上載兩人的恩愛合照放閃，羨煞旁人！
《2016香港小姐競選》決賽前晚圓滿結束，大熱馮盈盈（Crystal）揮低上圍Big爆的劉穎鏇，以36,679票順利贏得后冠，惟當選後立即遭翻舊帳，被指原來是「粗口港姐」！
Crystal被揭於2014年佔領運動期間在社交網Facebook連環爆粗，當時她轉載了一段有關一名女子與男子疑似發生身體碰撞的短片，Crystal似是看不過眼，以長文爆粗狂鬧事件中的男子，她留言：「以後我出街畀人非禮，有晒證人有晒片，捉埋個疑犯都唔X使旨意告得佢入」她亦非常關心社會及民生問題，屢次留言辱罵多位官員，並對某個「數字粗口」情有獨鍾，經常以該字留言。網民對盈盈爆粗留言一事持不同意見，有人讚她性格率直，講粗口並不代表甚麼，亦有人不滿她在台上扮斯文。
約埋港男齊齊滾
Crystal與其他得獎者昨日出席頒獎記者會，對於爆粗留言，她直認其事，自言當時少不更事，如今「經一事長一智」：「當時入大學冇耐，受身邊氣氛影響。呢個係私人平台，只係想同好Close嘅朋友分享感受，有啲係過激，但我平日唔講粗口，只係打出嚟。（有人話你爛口？）可以問番其他佳麗，我真係唔會。（影響港姐形象？）港姐形象係由多方面組成，唔係單一事件，呢個世界冇人係完美，有咩唔啱我會改。我依家成熟咗，有啲事可以有唔同睇法，日後會多啲注意言行，其實戴上后冠已經覺得好重，背後責任更重，我好愛香港呢個地方，希望帶來多啲正能量。」 至於無綫對於Crystal曾爆粗一事不作回應。
而前晚當選後，Crystal坦言沒想過可以得獎：「望住其他女仔都會諗贏唔贏到，諗諗吓會覺得冇乜機，結果夢想成真！（致勝關鍵？）贏在真心！好多人可能會想突出自己，其實唔需要，只要做最真心，講真說話。（覺得贏劉穎鏇啲乜？）贏在夠矮，鏡頭易搵到我！冇諗過贏到佢，佢一直係大熱門。（點慶祝？）想搵屋企人，食西多士，起碼兩塊！」騷後，一眾港姐及港男留在電視城拍攝官方刊物至凌晨3時許，其後仍未捨得回家，一行人轉戰九龍城打邊爐，至昨晨約5時才離開。Crystal約5時30分返回大圍寓所，但沒有家人前來迎接，她透露家人早已入睡。
男友係十優醫生
另外，Crystal的醫生男友鍾文浩（Martin）前晚與馮母到現場打氣，其實Crystal參選期間已刪走與男友的合照，但Martin未有「配合」，Facebook頭像仍是兩人慶生的照片，當中亦有咀嘴合照，認真閃到爆！盈盈被翻舊帳，Martin亦被揭讀書成績超卓，2005年會考勇奪10A，其後入讀香港大學醫學院，現時在瑪麗醫院任職內科駐院醫生，Crystal昨日亦激讚男友優秀：「我就考DSE，一定冇得10A。（專登揀10優男友？）唔係o架！有時覺得喺佢面前，自己IQ爭少少。（因為佢飛走前任？）唔係，兩段戀情相隔一段時間。」
文：影視組
|
鍾意就快D Share啦！
|
|
|
