容祖兒、李克勤日前到惠州舉行巡演，一直鍾情室內場館的二人，這次卻「摒棄傳統」，在惠州露天大球場三面台會觀眾。兩人汗流浹背施盡渾身解數，最終跳到連底褲都濕埋，贏盡全場掌聲。雖然場館限制要於晚上十一點關門，但由於觀眾不肯離開，全場站立不停叫安歌，最終兩人冒着被停電的危險，再唱多十分鐘才散場。
祖兒忍痛開工
祖兒在騷前綵排時已邊跳邊叫「腳痛」，原來她在家中打爛玻璃杯，疑沒掃清乾淨，早上起床不小心踩玻璃。但忍痛力特強的她，竟可以繼續開工。到惠州騷臨開場前，祖兒腳痛愈來愈嚴重，最後在化妝間，由一眾工作人員上演「妙手仁心」，一起捉實她的腳掌，然後用火燒熱一支針，並由祖兒助手操刀為她把玻璃碎挑出來。祖兒謂：「係因為我不停話痛，大家可能頂我唔順，突然就好多隻手捉住我隻腳，又夾又放大鏡、又針又鎅刀咁，然後一粒鑽石戒指咁閃的玻璃碎就出咗嚟，終於舒服晒。」
克勤誘祖兒除衫？
另由於是次在室外開騷，克勤唱完第一部份已在台上大喊：「嘩，究竟天氣熱定你哋熱情？熱到我底褲都濕埋。」祖兒聞言即謂：「你咁熱，除衫啦。」但最終克勤只是當她熱到「傻咗亂噏嘢」，誓死唔除外套。克勤謂：「我唔係走呢啲路線！雖然我都有keep住健身，但唔係露體狂。」祖兒即笑道：「你話我呀？我做演唱會都幾暴露㗎，哈哈。」克勤再回話謂：「我唔係話任何人...總之，上次有譚生（譚詠麟）陪我一齊，我咪試過一次做大隻佬囉。有佢喺隔籬傍住個心定好多，自己一個露就唔好啦，一係下次你又除啦，你除我咪陪你囉。」
祖兒想到Miffy故鄉做巡唱
祖兒、克勤稍後仍會繼續到湛江、深圳、上海、星馬等地舉行巡唱，克勤謂其實他最想去新西蘭唱，因想感受大自然，並謂想一嘗對着綿羊唱歌的滋味。祖兒則謂想去荷蘭，至於原因竟然是因為荷蘭是Miffy故鄉。
|
鍾意就快D Share啦！
|
|
|