已過六張的李中寧，離開娛樂圈廿年，兩年前回流香港，去年 6月成功考牌做保安。
娛頭
退役脫星 自爆患腦退化 做停車場保安過日辰 李中寧：對人生冇留戀
近年娛樂圈古老當時興！ 80年代的小生林俊賢、邵仲衡、吳岱融相繼被掘出幕前，連帶與郭富城同期受大台力捧，離巢後拍過不少三級片的李中寧，亦成為網友搜挖對象。原來已屆花甲之年（ 60歲）的李中寧， 14年退休後已由英國回流香港，撞正有朋友開保安公司，於是考牌做停車場保安，打發時間。
神隱廿年的李中寧接受本刊訪問時有問必答，唯獨感情事例外，更自爆患有初期腦退化，但並不擔心病情惡化。「我對人生無留戀！」李中寧看似輕描淡寫，其實灰到裂。
停車場站崗
香港人健忘，要不是同期受大台力捧，稱為「銀河十星」之一的邵仲衡回歸拍劇、胡越山之子胡[!FE6E]參加今屆港男，可能亦未必有人記起，這位一代三級片男星李中寧。
九五年，拍罷電影《信有明天》後，李中寧決定離開娛樂圈，移民英國開餐館。
神隱廿年，同圈中人全無聯絡，除了近年網上流傳李中寧以蔡李佛師兄身份示範打沙包外，便未有機會見過真身。
直至最近，本刊發現脹了幾個碼，頭髮斑白的李中寧，竟在港島區一幢商業大廈做保安員。
每日中午時分，著住反光背心的李中寧便走到停車場外站崗，不時四圍踱步，只要有車輛進出，他便趕緊走到馬路邊充當指揮，「先生、小姐，小心呀！麻煩行快兩步啦，就嚟有車出喇！」
遇上途人問：「投注站喺邊？街市點去？」眼前的肥叔叔都冇托手踭，但根本冇人一眼認出他就是拍了過百部三級片的電影男星。
撈散變長工
車輛進出這幢大廈的次數算疏落，加上每兩三小時便換班，李中寧的工作稱得上「他條」。每晚踏正七點收工，李中寧連反光背心都唔除，便慢慢行去街市買餸，他專揀預先醃好的餸菜，方便返歸可以立即落鑊。
連日所見，李中寧不論買完餸抑或收工，總會返回任職的商業大廈，再從其他地方離開，相當神秘，問他現時的住處，他支吾以對，只透露同另一個三級男星曹查理是街坊。「我住喺邊呀？住喺邊？託賴啦。我仲有自己物業！」李中寧說。
李中寧表示一心諗住「炒散」，方便自己有多點私人時間「做自己嘢」，點知老闆長期缺人，幾乎一星期做足七日冇假放，不過「唔使擔唔使抬」，所以先留低繼續做，當過日辰。
留港祭父母
李中寧未入行，父母已經離世，促使他入娛樂圈，因為有一個任務要去完成；事隔三十年，李中寧聲稱已達到目的和任務完成，但卻不肯透露半點內情，照估計，與他同父異母的妹妹葉童不無關係。
對於當日父母離世，自己未有在旁，他一直耿耿於懷。「一直都原諒唔到自己！」直至退休後，李中寧見自己年紀大身體唔好，一四年五月拍板搬返香港。「留响英國的話，就算飛返嚟一次，都係拜佢哋（父母）一次，仲有清明、生忌、死忌、重陽，人喺香港，可以多啲睇吓佢哋。」李中寧說。
靠藥物延緩退化
咪睇李中寧又肥又大隻兼且習武多年，在娛樂圈短短的十年時間，高峰期五日四夜趕拍劇，積勞成疾抵抗力變差，患上白蝕，同頑疾搏鬥多年外，拍戲試過與陳惠敏對打，不慎墮海跌斷腳，如今翻風落雨仍會有反應，絕不好受。
回流香港後，李中寧更發覺自己經常出現去到一個地方，完全零印象，亦唔知自己點解要去同做乜！「醫生話我有初期腦退化，等於年紀大有老花。」
靠食藥延緩病情，但李中寧態度從容，似不太憂慮。「你信又好，不信又好，我其實唔留戀，我唔留戀我嘅人生……我過去又唔光彩，內心又黑暗，經歷又痛苦，唔開心㗎！」李中寧說。
無悔做脫星
李中寧口中提到的黑暗、不光彩，是他那兩年拍近百部三級片的歲月？
「拍三級片我絕唔介意，我係有目的而為……坦白講你情我願，唔係得我一個拍三級片，個人選擇……我同黃秋生係同期拍，經過深思熟慮！」李中寧說。只六十出頭，肥叔叔李中寧會考慮復出幕前？「冇興趣！」好決絕。
三級超人
李中寧是葉童（原名李思思）的同父異母兄長，不過兩房人一向沒有往來，葉童更拒絕提及有關對方的任何事。
八六年加入 TVB，當時被稱「肥版梁朝偉」的李中寧，曾經與郭富城、邱淑貞、李婉華及邵仲衡等人被力捧為「銀河十星」。九○年香港三級片大行其道，李中寧加入脫星行列，拍攝首部三級片《三度誘惑》，結果一脫而紅，有過千萬票房，戲中他「三級超人」角色更成為經典，自此走上不歸路，先後同過邱月清、陳寶蓮、秦虹及梁思敏等多個脫星上過床（拍床上戲）。九五年，李中寧決定淡出娛樂圈。
自力更生
做過明星，就會有人認得出，所以要放得低，轉行做番一般打工仔，絕對唔係一件易事。
撰文、攝影、攝錄：娛樂組
|
鍾意就快D Share啦！
|
|
|