探熱針
獨家捕獲 比卡超護肚 Baby返港待產
去年底 Angelababy黃曉明大婚，曉明媽開晒口話恨抱孫，而且一個唔夠，要生夠半打。奶奶下旨， Baby豈敢怠慢，即使婚後兩公婆各有各忙，都搵機會密密造。今年 5月，終於得咗，造人成功，而且一索得男！
延期避風
上週 Baby返港，著住鬆身衞衣的她，側面睇，似足五個月。不過大肚婆冇走樣，依然面尖尖，手腳纖瘦。
婚後五度傳出喜訊，但鋪鋪炸胡，今次終於嚟真喇！之前被老友水原希子爆響口，月初，黃曉明始親自在微博公布做老豆：「三個人的旅行，以後還要一起很多次，感恩，媳婦兒。」 Baby隨即搞笑回認：「恭喜你呀！」
距離預產期仲有幾個月， Baby要暫時離開老公，返港長住，準備生 B。原本打算上週三（十月十九日）坐夜機返港，但撞正颱風同黑雨，安全起見， Baby決定延遲一日上機。
三助手六個喼
週四（二十日）下午， Baby在三名助手護駕下返抵香港。身穿白色衞衣加短裙的她， cap帽、口罩包到冚，手上仲拎住大大隻比卡超公仔。懷孕五個月， Baby面尖尖，身形依然纖瘦，正面唔似大肚婆，但側面睇真啲，雖然著住鬆身衫，但肚凸凸，好明顯！
當日 Baby執齊行裝，一共帶了六個大喼返港。一出閘，大肚婆嗌口渴，一行四人操去果汁店， Baby揸住 menu，三心兩意，揀咗一輪，最後 order了一杯鮮搾紅蘿蔔汁。
同助手企埋一邊飲果汁，遇上途人行過眼望望，除低口罩的 Baby即刻用比卡超公仔遮肚。飲完嘢，一行人行去停車場上車，接載 Baby的七車人，後窗已經貼住「 Baby in car」貼紙，做定準備。之後 Baby直返貝沙灣寓所，之後全日未見外出。
睇中醫半年
婚後 Baby嫁雞隨雞，入住老公位於北京朝陽區豪宅。為了一圓黃曉明四十歲前做老豆的大計，兩公婆近半年 keep住睇中醫調理身體。得知成功有咗，未來老豆黃曉明非常緊張，要 Baby盡快停工，返香港安胎。
「第一胎佢哋決定喺香港生， BB有香港出世紙，將來就算留喺香港讀書都方便啲， Baby手頭上嘅工作都做得七七八八，嚟緊冇乜大 project，都係出吓活動同做電影宣傳，所以返香港安胎，睇醫生做檢查都唔使飛來飛去。曉明就好緊張， Baby出入，都一定搵人傍實佢！」 Baby身邊人說。
好生養
多啲嚟，密啲手！ Baby同黃曉明 target生六個，一啲都唔誇！圈中唔少夫婦，婚後都拿拿聲趕造人，三個起跳！
陳豪陳茵媺
出晒名勤力的陳豪陳茵媺， 13年結婚後三年抱三，先後誕下兩子 Aiden同 Nathan。今年終於追女成功，細女 Camilla出世後，陳豪宣布老婆封肚，三個夠數！
陳浩民蔣麗莎
11年陳浩民迎娶湖南 model蔣麗莎，同年誕下女兒， 13年再生一子，湊成「好」字，之後繼續密密做，分別在 14年及 16年再誕下兩女，一子三女，夠腳開枱。
徐子淇李家誠
「千億新抱」徐子淇 06年嫁入豪門，唔夠一年誕下大女李晞彤， 09年再添一女李晞兒。兩年後成功追仔，為李家誕下「金笸籮」李俊熹， 15年次子李建熹出世後，宣布封肚。
撰文、攝影、攝錄：娛樂組
|
鍾意就快D Share啦！
|
|
|