上週五（廿一日），陳豪、陳茵媺撇甩三個 B出發歐遊，過二人世界。
探熱針
跟隊扮去新加坡 陳豪陳茵媺血拼米蘭
圈中「模範夫婦」陳豪陳茵媺，結婚三年，連生三 B，勤力又富生產力。細女 Camilla今年四月出世後，豪嫂 Aimee匿埋專心湊女半年，終於回復元氣，同老公孖咇出動，叉電歐洲。
上週五（十月二十一日），陳豪同老婆撇甩三個 B出發歐遊，先去羅馬，再飛米蘭。啟程當晚，撞正無綫一班花旦、小生拉隊飛新加坡出席頒獎禮，為免洩露行蹤，陳豪同豪嫂一招混水摸魚，黐埋大台大隊等 check in，成功轉移視線，醒爆！
轉移視線
「海馬」襲港！陳豪陳茵媺仍可如期出發，搭凌晨機，夜晚十一點，兩公婆已抵達機場，撞啱無綫一班藝人包括胡定欣、陳展鵬、李詩韻等同樣搭深夜機出發，全部自己友，好熱鬧！
見現場有傳媒，陳豪同豪嫂於是混入大隊中，一齊等 check in，陳茵媺又同李詩韻鬼咁好傾，唔講真以為大家是去同一目的地新加坡。
難得可以丟低屋企三個 B過二人世界，兩公婆未出發，先興奮！即使眾目睽睽，陳豪都情不自禁，攬實豪嫂錫錫；辦好登機手續後，兩公婆繼續十指緊扣，拖實行去入閘。
叉電回氣
生完再生，一於再生的陳豪，早前曾勁呻湊三個 B好吃力，加上陳茵媺出名「緊張媽咪」， B女出世半年，她因為要餵人奶而日日寸步不離，結果捱到身體出問題要住院。
老婆連生三個，陳豪亦終於肯收手，宣布收工唔再生。細女 Camilla足六個月大，兩公婆決定出埠旅行，回一回氣。
「佢兩公婆好多年冇試過二人世界去旅行，次次去親都一家大細。 Camilla半歲， Aimee停咗餵人奶，可以有機會行開吓。今次揀去意大利，因為 Aimee想去米蘭 shopping，不過佢哋都唔放心去得太長時間，玩一個星期就返嚟。」陳茵媺身邊人透露。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|