掃呢頁CODE去手機

2016年10月27日 星期四

鹹魚欄藏名媛私竇 [壹週刊 - 1390 - 財經] __,M1,

包陪慶以往在國慶晚會親自落場瞓身表演。中環人語鹹魚欄藏名媛私竇呢排城中闊太都竊竊私語,何解樣子平凡的小三可以乘虛而入仲要搏坐正,口痕阿太就話,大婆衰沉迷跳舞引發綠帽疑雲,因而影響夫妻感情,不過社交舞乃是健康正氣運動,大家千祈咪戴有色眼鏡去睇。好似已故船王包Sir長女包陪慶,就身體力行推廣舞蹈,喺上環鹹魚欄自置一層物業,作為跳舞私竇,讓志趣相投的闊太有個舞池練習跳舞。呢間舞蹈學校名為DansinnH ...


包陪慶以往在國慶晚會親自落場瞓身表演。

中環人語

鹹魚欄藏名媛私竇

呢排城中闊太都竊竊私語,何解樣子平凡的小三可以乘虛而入仲要搏坐正,口痕阿太就話,大婆衰沉迷跳舞引發綠帽疑雲,因而影響夫妻感情,不過社交舞乃是健康正氣運動,大家千祈咪戴有色眼鏡去睇。

好似已故船王包 Sir長女包陪慶,就身體力行推廣舞蹈,喺上環鹹魚欄自置一層物業,作為跳舞私竇,讓志趣相投的闊太有個舞池練習跳舞。呢間舞蹈學校名為 Dansinn Heavenly Studio,剛剛裝修完,喜歡跳舞的闊太熟晒架步;導師有來自英國、俄羅斯以及國內等,但只接受私人教授,團體課程就免問,學校幾位董事如 Andrew John Sinkinson、 Michal Ryszard Malitowski都屬世界級舞王高手,睇 YouTube其表演,真係扭得特別有美感。佢哋經常到世界各地觀摩,吸收最新舞蹈資訊,班舞蹈老師用以持有 studio的公司名都十分銷魂—— Soulmate(靈魂伴侶) Investments Ltd,幾有意境,所以話班名媛唔跳到上癮都幾難!

放在私竇𨋢口的水墨畫,是贈予包陪慶的,四十五分鐘私鐘教授,收費$690起。

Andrew John Sinkinson

Michal Ryszard Malitowski

梁君彥戀戀英倫

梁君彥在倫敦 Kensington Onslow Gardens 47號(紅圈),持有樓上其中一個單位。

新任立法會主席梁君彥上週二被敝刊揭發,漏報兩家英國公司權益,回應記者時就叫大家即管投訴佢,翌日梁主席急急腳向立法會補飛申報,查實又使乜咁避忌,一間公司做成衣貿易( Sun Hing U.K.),另一間 47 Onslow Gardens公司,都只不過喺倫敦 Kensington揸住個 Town House其中一個單位啫,又唔係莊園堡壘,主席保留英籍幾十年都唔捨得放棄,唔揸番個倫敦物業仔又點夠睇頭呢?

中環寸嘴 唔好教爸爸做愛

老友 MaBelle老闆 Max Ma(上圖右一)請咗 A貨 Beatles來港表演,請我全家(下圖)去飲頭啖湯,在馬會聽歌,齊齊戴埋假髮披頭四上身。

政府又攞四千三百萬搞個「提升資產財富管理業人才培訓先導計劃」,傻強話想吸納有潛能嘅畢業生加入呢行; Come on, give me a break!教爸爸做愛咩?啲𡃁仔「毛都未出齊」就去同人哋做資產管理,叫佢數毛就差不多。啲𡃁仔見過幾多場大風暴?根本啲風暴殺到嚟都未聞到朕除,唔好話洞悉先機。

有時啲銀行佬搵我食飯都唔係好想去,因為都冇料俾到我,仲問番我:「點睇個市呀,楊生?」呢個世界「羊毛出自羊身上」,你估真係銀行佬請食飯呀?你冇番咁上下生意俾到佢,真係食西北風啦。班友都係有私心去谷公司產品,尤其外資行啲洋鬼子阿頭 no mercy,同下屬講明,一係個客死一係就你死呀!但條鬼仔就唔會死。最緊要佢在位時開到單,過得一陣又拍拍籮柚調去第二個地區。

以我喺 New York同衍生工具先驅者開盤嘅經歷,香港搞呢啲乜春金融服務先導計劃,俾唔到實戰經驗啲𡃁仔,我喺西岸有些少名望嘅 UBC叫做戥腳做過 visiting lecturer指點吓後輩,人家 Business School會揀三個最 top嘅二年級學生,喺 UBC退休基金攞兩百萬加紙出嚟,再搵銀行佬、燕梳佬及基金佬,傍住三個學生前後浸淫三年去「炒」,三個𡃁仔再向同班同學仔分享兼解畫,咁樣先日子有功,非食即食麵那回事。傻強,此乃學術派同實戰派嘅分別!!!

(右二)楊國佳

楊國佳

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

石油大王情迷嘉慧園

有「香港石油大王」之稱的劉浩清兩個月前仙遊,至本週訃聞才見報,然而通訊處未見其「東方石油」寶號,查實「石油大王」美譽又點可以冇咗愛國商人霍英東背後的支持,七三年石油危機,已富甲一方的老霍與當時為上海中大輪船總經理的劉浩清共同創立「東方石油公司」,取得內地石油的出口代理權,令中國石油在香港打開市場,從此劉浩清就領受咗「石油鉅子」甚或「石油大王」呢個朵,但商界嘅印象劉浩清仍為霍英東條「𡃁」;數風流往事,霍英東發展的半山豪宅嘉慧園,以邵氏影星歐嘉慧命名就街知巷聞,只不過劉浩清九十年代返上海做慈善,也不忘記念其拍檔的紅顏,他把上海一幢物業的租金撥作上海市教育基金會,呢幢物業同樣命名為嘉慧園;所以話,呢位石油大王做慈善都彰顯啲藝術㗎,如果唔係點拍得住老霍呢?

去年劉浩清(右二)與兒子劉鐵成(右一)向浸大捐出一千萬元。

有美人魚之稱的歐嘉慧,是何守信前妻,一九五六年獲全港華人游泳冠軍。

東方石油一九七三年由霍英東及劉浩清創立,各佔一半股份。


鍾意就快D Share啦!