為了「消滅」家中的小朋友舊衫，於是諗出將舊衫製成「百家被」，結果大受歡迎。
壹起創
實體轉網購 媽媽搞創業同盟
做媽媽，的確唔容易，既要照顧子女，又要兼顧家庭，如果要創業，就更加不容易，所以本來搞時裝生意的 Macy，由擁有實體店，變成專搞網購，成功轉型之餘，更加聯同其他創業媽媽，搞「香港地創業媽」，跟其他媽媽分享創業心得。
一切都是為了子女！原本與丈夫開設多間時裝店的 Macy，在大仔出世後，索性由時裝轉攻童裝，售賣自家設計的童裝，並開設品牌「 Little Fitting Room」，不過眼見近年零售市道下滑，於是逐步將時裝店關閉，最後更只剩下童裝店，「之前在開童裝店的時候，亦有在 Facebook開設專頁，而且都有 keep住在 Facebook落廣告，當時忘記設定廣告終止日期，於是不經不覺每月花費幾千元在廣告費上，粗略估計，單是在 Facebook上的廣告費，已經使咗近十萬元。」
適應轉型
以為是一個花費不菲的「善忘」，卻竟然為 Macy暗暗闖出另一片天，「因為上年零售市道實在非常差，連童裝店都要蝕本，最後都要關門大吉，但原來 Facebook專頁卻不知不覺間，已經有兩萬多個 Like，於是覺得轉做網購亦都可行，加上當時又再懷孕，為了時間上更有彈性，所以決定轉做全網購。」不過由實體店轉型做網購，同樣要經過一番適應。「開鋪頭，客人可以拎實物上手，摸完試完先買，不過做網購，就要好詳細講解衣服物料、質地同尺寸等，兼且每件貨物都要影相，甚至要搵小朋友著上身拍照，好彩自己都鍾意影相，所以好快就適應到。」後期更憑集合小朋友舊衣製成「百家被」，以及自創「餵奶巾」，令人氣更上一層樓。
分享心得
雖然現時 Macy的網購生意已經步上軌道，不過誤打誤撞，反而叫 Macy更加忙碌。「幾個月前，在一次訪問中，認識另外兩位創業媽媽，本來只打算約出來談天說地，不過言談間，大家都認為可以為其他創業媽媽，分享自己的創業經歷。」於是在 Facebook成立「香港地創業媽」專頁，由於當時臨近中秋節，所以決定搞花燈會，既要有攤位、遊戲之外，還有創業心得分享等環節，雖然籌備時間非常倉促，但結果令 Macy非常驚喜，「最後埋單計數，有成二千多人出席，對自己來講的確好大鼓舞，亦在當中學習到如何搞一個大型活動，同時更認識到不同的創業媽媽，從每個人身上不同的經歷，令自己於學習中成長。」 Macy表示會將更多時間投放到「香港地創業媽」上，雖然同時兼顧多項工作，但 Macy也不忘講句：「多謝老公支持。」
撰文：劉耀祥
攝影/攝錄：關永浩
ed_bn@nextdigital.com.hk
|
鍾意就快D Share啦！
|
|
|
