曹永廉呢個名相信大家都唔會陌生，但係要講佢有咩代表作你又真係講唔出，最多都係記得佢喺《公公出宮》演咗太監「細雞」。不過今年52歲嘅佢終於捱出頭喇，前晚佢喺新加坡《星和無綫電視大獎2016》奪得「我最愛TVB男配角」，總叫入行23年有個交代。連佢嘅《公公出宮》拍檔黎耀祥同好兄弟洪天明都有喺微博留言恭喜佢。曹永廉憑住《公公出宮》奪得「我最愛TVB男配角」，佢好感動咁講：「我好後生入行，轉眼已23年，我唱歌出身，攞到這個獎證明我冇入錯行。」等陣先……曹永廉好後生入行？佢29、30歲先入行喎。睇嚟人人對後生嘅定義好唔同，古語有云「三十而立」，做人處事都已經有一個自己嘅見解；唔再係十八廿二「吊吊揈」，見一日過一日喎，咁遲入行都叫後生？曹永廉未入行前係做sales，仲要係女性內衣嘅sales，阿廉早年接受訪問時講過：「搵食啫，有乜慘得過爭十幾萬卡數又無飯開？」其實佢心水都幾清，仲話：「我放低咗尊嚴好耐喇。」或者係有咁嘅經歷，先可以令佢可以豁出去咁飾演每一個角色。到啱啱播完嘅《律政強人》飾演任偉樑，做「食女王」，而且城府深又攻心計，喺張強(方中信飾)同KC(廖啟智飾)之間做「牆頭草」，仲要忍受被當狗一樣嘅待遇，令人諗番起：「我放低咗尊嚴好耐喇。」一句，的確，經歷影響演技。雖然事業浮浮沉沉，不過阿廉遇上生命中最重要嘅人，姜大偉嘅大女——姜依蘭。二人婚後育有一子一女，阿廉喺訪問入面話，最初知道太太有喜時好擔心，因為結婚、擺酒、搬屋，等等全部都係錢；即使有計劃結婚，但係一下子將所有事推前去做，感覺被打亂咗陣腳。不過到囝囝出世嘅一刻，親手抱住BB嗰一下實在嘅感覺，令佢感動到流下男兒淚。所以話，真係莫欺「少年」窮，無論幾多歲入行都好，總會有捱出頭嘅一日，不過有幾多人有咁嘅韌力又係一件事。
|
鍾意就快D Share啦！
|
|
|