今天是藝人羅仲謙與楊怡結婚的大喜日子，一對新人於下午約五時見記者，《東網巨星》fb更全程直播一對新人的幸福喜悅！
新娘子楊怡站在老公身邊，一臉幸福，二人更大晒閃爆婚戒，楊怡說：「佢嘅戒指上面有個『H』，即係Him啦，我隻戒指就係一個『T』，係代表大家嘅英文名，寓意白頭到老，一齊開開心心，幸福！」
羅仲謙：我認定楊怡呢個女人！
楊怡透露今日簽字時非常感動，她說：「好感動，但唔算係好緊張，個心好感動，入去會場已經喊。（依家講番都想喊？乜嘢誓辭特別感動？）唔記得咗，死啦死啦……生啦生我同佢（羅仲謙）講，我會講5分鐘，你唔好講1秒鐘呀！」但當傳媒要求二人重講誓辭內容，楊怡即刻阻止老公。
謙謙則藉機公開愛的宣言冧老婆，他說：「我入會場已喊，比喺英國時更感動，可能因為今日有屋企人見證住。我好多謝阿怡，由拍拖到依家踏入第六年，跟住結婚，只有阿怡一個全心全意支持我、信任我，我認定呢個女人，我應該永遠保護！」楊怡也化身幸福小女人，回應老公說：「我其實要嘅幸福好簡單，我唔使食乜好嘢，所以我咁瘦，亦唔使坐靚車，我同佢（謙謙）講，只要我哋手牽手，就可以行到老！」
姊妹怕咗一塊尿片！
謙謙又指接新娘過程比預期暢順，他說：「過程比想像中容易，因為豹哥（單立文）喺度，同埋我哋嘅政策（策略）順利，就係不停揼波鐘，對我哋嚟講啲遊戲唔係好難，都係擺隻腳入冰桶，都有食尿片，係豹哥食，點知佢一嘢『質』咗落康華塊面，以暴力解決！」楊怡則心痛好姊妺，她說：「豹哥搞到康華要補妝，我起初仲以為啲姊妹好犀利，點知一塊尿片就敗走！」
講到有傳開門利是有十萬，謙謙笑言：「呢個傳嘅啫，實際數字我都唔知幾多，總之個利是封『質』到幾多就幾多，『質』到個利是封都『質』唔落。我未入會場嗰陣仲諗住加碼，想去撳機，點知佢哋收貨喎！（諗住撳好多？）撳機可以撳到幾多吖！」
已經開始造人
至於造人大計，謙謙直言想兩年抱三：「我其實想生女先，因為我係細佬，做細嘅好幸福，多謝大家關心，總之隨緣。（開始咗造人）係！開始咗，睇天意（今晚預飲酒？）我向來滴酒不沾，搵王浩信、豹哥、吳卓羲幫我飲。（有乜遊戲玩？）嘩，你喺我老婆面前問我？」
|
鍾意就快D Share啦！
|
|
|