藝人羅仲謙與楊怡今日大婚，新郎及兄弟團一早八點幾就已經出動，現身酒店準備接新娘，星級兄弟團包括何君誠、馬國明、吳卓羲、單立文及王浩信，現場更出動到航拍，實行多方位紀錄今日婚禮！
滴汗兼聲沙 羅仲謙嗌緊張
謙謙接受訪問時猛流汗，又聲沙沙同記者傾偈。問到今日心情如何，謙謙直言心情既緊張又開心：「好矛盾，好似未整理好個思緒咁，都開心嘅，（心情）又緊張、又混亂，好驚自己帶漏嘢，一朝早好似傻咗咁，周圍去check吓啲嘢齊晒未，雖然都已經齊晒。（把聲沙沙哋？）係呀，瞓得唔係幾好，因為尋日我哋係唔可以見面，其實我同阿怡都兩日冇見，變咗自己一個人喺屋企就靜靜哋諗吓嘢。（冇開party？）冇呀，冇呀，冇呀！（掛住楊怡掛到瞓唔着？）呢兩日其實都係諗結婚嗰時大家要講啲乜嘢，自己又唔係好識講啲甜言蜜語、好感動嘅嘢，但係又唔想冇創意，所以呢個都係煩腦啲。」
袋定利是準備隨時加碼
問到係咪準備咗10萬蚊開門利是？謙謙笑笑口表示：「呢啲都係開心嘅啫，實則就唔使講出嚟。（有冇六位數？）實則唔講喇，總之兄弟姊妹團係滿意嘅！（怕唔怕被爆開門禮利價錢？）冇壓力，冇壓力，今日開心嘢會抱住正面嘅心情，會加碼，都準備咗啲（利是）袋住喺身，都驚佢哋要加碼時都有準備，我諗都冇咁順攤！」
謙謙大方玩遊戲：頭以下都可以任玩！
提到新郎哥接新娘時有咩「開門攻勢」，謙謙直言會先以金錢攻勢應對，再用體力及俊男兄弟們嘅美色，當記者再次問到金錢攻勢準備幾多錢，謙謙繼續耍太極：「唔好、唔好，總之開開心心就得，大家唔好掛住喺銀碼上面嘅嘢。」講到接新娘時玩遊戲有冇底線：「聽老婆（楊怡）講，因為大家都係靚仔靚女，咁就唔好搞亂個髮型，大家落到嚟都要見人，頭以下都可以任玩！食蟲就冇咩所謂，最玩得就梗係豹哥（單立文）啦，飲得嘅就係王浩信佢哋，我就樣樣都唔得。」
望生一仔一女湊夠「好」字
問到幾時派紅雞蛋？謙謙表示會盡力盡快，自己與楊怡有共識會順其自然，希望可以有一仔一女湊個「好」字：「我希望有一個囡囡先，之後先係囝囝。」之於度蜜月，佢指目前已將工作押後，望可以同兩家屋企人去個旅行，不過就未肯透露會去邊，淨係賣關子話唔會去東南亞。
|
鍾意就快D Share啦！
|
|
|