無綫主播變髮被斥唔合格 余浩宗含淚報新聞 高層下令：唔使返
無綫新聞部離職潮未停過，剛於上月請辭的24小時新聞台男主播余浩宗，前晚在直播報新聞期間忽然眼紅紅，原來因髮型問題與新聞及資訊助理總經理袁志偉起爭執，他被通知要調往通宵更，未料直播結束後，本來下月中離職的他，被高層勒令即時執包袱，惟昨日傍晚無綫又改口指不解僱他，但下令叫他至下月離職前不用再上班。雖然大多網民斥無綫苛刻兼制度舊，但於直播時眼紅紅，余浩宗承認情緒方面有出錯，希望大家包容！
前晚【剪髮後】
■余浩宗前晚直播新聞期間，全程眼紅紅，原來剛被「照肺」指他頭髮過短。電視圖片
【７月】
■余浩宗之前都是短頭髮，但就沒被挑剔。
【呻委屈】
■余浩宗前日在fb留言指討厭在無綫工作，不介意貼錢離職。
現年30歲的無綫新聞主播余浩宗，前晚8時30分至10時於互動新聞台直播新聞，一開始已見他眼紅紅兼面有難色，似足當日因男主播葉昇瓚因頭髮不合規格，被迫臨時上陣而最終淚灑直播室的黃紫盈。
【轉新髮】
■上月已向無綫請辭的余浩宗，日前趁放假期間剪髮。設計圖片
【被照肺】
■余浩宗於放假後復工首日即被「照肺」，袁志偉（右）斥他頭髮剪得過短，當日更勒令要他調往通宵更至離職。設計圖片
「短咗唔係鏟青」據知，余浩宗一個月前經已請辭，之前去泰國旅行充電後前日首日復工，即被新聞及資訊助理總經理袁志偉「照肺」，指他兩邊頭髮剪得太短，迫令他要調往通宵更，直至離職日為止，心情跌至谷底的余浩宗，最終於直播時情緒不穩眼紅紅，未料直播結束後被勒令執包袱即時離開。
本報前晚致電余浩宗，當時情緒還未平復的他，口震震表示不方便講太多，昨日記者再聯絡他，問他前晚髮型出了甚麼問題？余浩宗回覆說：「公司冇白紙黑字個頭要點，只講男主播唔可以鏟青，要端莊，自己一直都有銘記嘅，但我覺得今次只係剪短咗，唔係鏟青，公司覺得唔合規格，要我調去通宵更直到離職日，即係喺正常時段同觀眾講拜拜嘅機會都冇。」
余浩宗補充謂：「我承認自己喺管理情緒方面有啲出錯咗，一時間有啲感觸，加上直播前同啲朋友講咗件事，大家都好支持我，心情係有啲激動。」問他之後有何計劃？余浩宗說：「其實上個月已經辭咗職，噚晚都同公司講咗會提早離職，𠵱家只係早咗。」
■袁志偉自掌管新聞部後，主播大小事包括儀容都由他管。資料圖片
■余浩宗昨晚突然再收到無綫通知表示不解僱他，但不用再返工。互聯網圖片
■余浩宗早前與女友人到泰國旅行，豈料回港後即被公司叫「執包袱」。
原本即炒又翻兜不過，昨日傍晚余浩宗再向本報透露，表示收到公司決定不解僱他的消息，他說：「我都唔知發生乜事，人事部通知話公司決定唔炒我，但叫我唔使返工，有需要先搵我，咁我嘅last day就照番係下個月11日。」對於公司突然變動，余浩宗坦言最初表明不接受，但想深一層也沒所謂，他說：「我有話唔OK，因為噚日老細話要炒我，我連公司證都交低咗！佢哋話公司已經決定咗喇！不過是但大家好嚟好去，都冇乜所謂，唔想諗咁多喇！」
■黃紫盈大前年報新聞期間落淚，大大粒淚水黐在眼角。資料圖片
■葉昇瓚昨日對於余浩宗被勒令離職感愕然。資料圖片
另外，當日曾淚灑直播室的黃紫盈，昨日被問做主播時的髮型，她說：「公司都比較想女仔剪短頭髮，即使到膊頭以下都會想佢哋再剪，咁自己就會同佢哋講道理，解釋因為自己頭髮太厚，剪短會翹起，會花好多時間去打理同修剪，嗰幾年間唔中俾佢『哦』吓就冇理喇！」而葉昇瓚得悉余浩宗被勒令即時離職，坦言感到愕然：「停職又真係幾大件事，我當年都係警告吓，之後再執番整齊啲，就畀我再出番鏡喇！當日被臨時抽出要由紫盈BB頂上，都係因為個頭囉！好彩紫盈BB冇嬲我。」
採訪：小米
主播規條：唔准隨便發聲人稱「花仔」的新聞及資訊助理總經理袁志偉，曾指一個新聞主播要談吐清晰、有良好的判斷力及新聞觸覺等，但其實主播的外在要求亦非常嚴謹，男女一樣。
髮型：兩邊不能鏟青，劉海不可遮額，頭髮不可一支支豎起，也不能太扁。
化妝：女主播眼影不可以閃，遮瑕膏不可以反光，讓觀眾看得舒服。
衣着：無論男女，顏色不能太鮮艷、太花，男主播要穿西裝，女主播以套裝為主。
社交：不能隨便在任何社交平台發表任何評論及回應，盡量低調。
|
鍾意就快D Share啦！
|
|
|