藝人陳展鵬近年拍咗唔少無綫熱播劇之外，今年佢仲為劇集《城寨英雄》同《巨輪II》唱主題曲，早前佢同胡定欣憑《城》主題曲《從未知道你最好》奪得「星和無綫電視大獎2016」嘅《我最愛TVB電視劇集歌曲獎》，就知佢做戲同唱歌都係咁受到大家歡迎喇！
獲讚唱得又演得
人氣急升嘅展鵬，近日畀網友翻炒佢10年前仲喺亞視嗰陣嘅唱歌片段，當時佢為十大廣告頒獎典禮做表演嘉賓，當時唱Live嘅展鵬，一口氣唱出《失魂》同埋《聽聽》，重點係佢要有唱有跳，又唔喘氣，唔少網友都大讚少啲功架真係唱唔到㗎，仲話估唔到陳展鵬十年前都已經咁唱得，再比較埋佢近年嘅歌，網民話佢依家把聲成熟咗又厚重咗，大讚佢真係唱得又演得嘅藝人！
被逼暫停歌手路
其實陳展鵬唱得已經唔係今日嘅事，《東網》翻查資料其實陳展鵬喺1998年嗰陣簽過畀寶麗金做歌手，出過幾首歌嘅佢，喺樂壇發展都唔錯，但翌年因為寶麗金被收購所以佢做歌手呢條路都要被逼暫停，之後佢就加入亞視再轉投無綫，雖然事業係有少少轉折，但演藝道路發展得一帆風順㖭！
力撐拎無綫視帝
而網友都話對陳展鵬大為睇好，認為佢今年佢喺《城》表現出色，今年視帝一定非佢莫屬，仲話一定要投佢一票，其實數數手指陳展鵬已經拎過三屆星和視帝，所以網友都好想見佢喺無綫拎番一次視帝，話佢真係好有實力㗎！
網友有話兒：
老蕭愛XX：我一早話佢會紅嫁（㗎）
xhloe chxx：佢唱歌唱得好投入啲感情，把聲又咁好聽，抵佢宜（依）家紅咗。
少年3.1xxx9：今年視帝必投
處女xxx狂：以前唱歌，好似唔係咁識收放，近年佢唱tvb主題曲就好好多
Nxxxman Txx：：又唱又跳，勁有功架！
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
