以下呢個po，有聲，有畫面——但冇相冇片。如果今晚咁啱喺現場目擊事件經過嘅蘋民，歡迎爆相爆片。事件女主角，係46歲嘅童顏人妻梁小冰。地點不詳。件事係咁嘅（因為小冰嬲豬之下一口氣寫成件事，307字得10個逗號，可能一時間會覺難以消化，所以重寫一次），今晚，食緊魚蛋嘅小冰，乖乖企定喺紅綠燈前，等轉綠公仔過馬路。守法抵讚。但小冰身後，有一個心急嘅阿嬸，佢等唔切，想衝紅燈，但地理環境唔容許，所以，呢位急嘅大嬸，只能用佢畢生最強橫嘅武器——眼睛噴火，睥實「擋路」嘅梁小冰，然後，繞過小冰，衝紅燈過馬路。因為大嬸當時真係好急，對眼又掛住向小冰噴火，所以根本冇留意路面情況有冇車。小冰當時好心想提醒佢「紅燈咪過呀！」點知大嬸過咗一半，咦，𨍭綠燈喎！係喇，呢個moment，如果你係嗰位大嬸，你會點？大嬸嘅選擇係：擰轉頭，鬧小冰！據小冰形容，當時大嬸擰轉頭鬧佢：「掛住食嘢（魚蛋），阻住晒條路！」咦，大嬸唔認得佢係小冰咩？成件事重點嚟喇，小冰寫道:「佢（大嬸）以為我真係0靚妺，唔敢還口！激到我無名火丈三千起，追咗佢成條街大大聲教訓番佢！」46歲嘅梁小冰、《導火新聞線》裡面機關算盡畫好深眼神嘅「皇阿媽」，俾大嬸當咗佢係「0靚妹」？仲要俾對方當街兜口兜面亂咁噴？而小冰竟然放下明星身份，還拖？仲追咗個大嬸成條街反擊？小冰反擊大嬸嘅內容，就係:「我當街食嘢好正常，但你衝紅燈係你唔啱！犯法㗎！如果你俾車車死，仲連累埋司機，而且條街唔係你㗎！我停喺度因為係紅燈，唔係因為我食嘢！」啪啪啪啪——係掌聲嚟嘅，掌聲係俾小冰嘅。點知呢位大嬸仲不停同小冰駁嘴，反唇相譏。結果點？結果小冰追住個大嬸，鬧鬧鬧鬧到佢唔敢再出聲為止……小冰結論：「我最憎啲惡女人橫行霸道，唔好以為我似0靚妹就隨便恰人，就算俾人認到我係邊個，一樣照閙番你𨍭頭！等你以後唔敢再欺負人！！！」小冰，你好猛！
當然，全文另一重點，如前所述，係46歲嘅梁小冰，俾人當佢係0靚妹！全文講咗三次！因為好重要，所以要講三次！
以下係小冰原文：
「今晚喺紅綠燈等過馬路嘅時候遇到個阿嬏企係我後面嫌我0靚妹掛住食魚蛋擋住佢過馬路，即刻用討厭我的眼神睥我一眼然後繞過我前面去衝紅燈過馬路又無睇清楚路面情況，我正想提醒佢係紅燈唔好過，點知佢過咗一半馬路𨍭綠燈，佢過完之後即刻轉頭鬧我食嘢阻住哂佢行，佢以為我真係0靚妺唔敢還口，激到我無名火丈三千起追咗佢成條街大大聲教訓番佢我當街食嘢好正常，但你衝紅燈係你唔啱，係犯法㗎！如果你比車車死，仲連累埋司機，而且條街唔係你㗎！我停係到因為係紅燈唔係因為我食嘢⋯⋯但佢仲不停同我駁咀，結果我追住佢鬧到佢唔敢再出聲為止......我最憎d惡女人橫行霸道，唔好以為我似0靚妹就隨便恰人，就算比人認到我係邊個，一樣照閙番你𨍭頭!等你以後唔敢再欺負人!!!」
|
鍾意就快D Share啦！
|
|
|