娛圈又多個準媽咪喇！繼車婉婉、張名雅、楊愛瑾先後宣佈陀B後，上年七月下嫁拍拖10個月建築公司副董事周曉東（Raymond）、今年35歲嘅葉翠翠亦終於造人成功，恭喜晒！婚後積極造人嘅翠翠，今年初已經傳過懷孕消息，亦俾傳媒影到佢頻頻睇婦科，可惜最終食乍糊。不過，《蘋果》近日收到消息，平時逢tea必到嘅翠翠，連月都謝絕應酬，就連閨密趁轉季想約佢血拼佢都唔去，絕對係一反常態。知情人同《蘋果》講：「呢幾個月都冇見過佢，約佢都唔出嚟，話好攰要休息。其實都估佢『有啲嘢嘅』，但係人哋唔講即係未講得住啦，咁大家都識做，費事問」噚日佢同老公出街，個人睇落「闊」咗咁噃！唔通......有喜事？唔好估喇，《蘋果》直接打俾翠翠求證，笑咗一輪嘅翠翠亦唔轉彎抹角，一口承認有喜。佢話：「係有咗3個幾4個月呀！因為老公怕BB小器，之前全部人都冇講，屋企人都係上一兩個星期先知道。」問到翠翠係咪等今日等咗好耐，佢就話：「都係呀，一直都有調理身體，知道有咗好開心，呢個係上天送俾我嘅禮物，我係生日前知道呢件事，而預產期就會喺老公生日前，至於呢個消息可以講得俾人知嘅日子，又咁啱係奶奶生日，所以呢份係送俾奶奶最好嘅生日禮物。」不過，翠翠話最緊要係BB健康，仔女唔係最重要，佢又話老公、老爺同奶奶都好開心，已下令佢哋要搬去一齊住。翠翠仲話：「老公話人生最開心兩件事，第一件事係同我結婚，第二件事件就係我有咗BB。」問到冇BB係男定女，翠翠就唔肯透露：「其實性別未肯定嘅，但係我一向有睇中醫，中醫都俾咗貼士我哋，老公知道都好開心，話一定要似佢。」
| （攝影：黃曉程、朱志聰） | | |
| | |
|
鍾意就快D Share啦！
|
|
|
