葉翠翠大肚大躉大胃口 老公估係仔：BB要似我
【中環】現年35歲的葉翠翠去年閃嫁拍拖十個月、任建築公司副董事的周曉東（Raymond）成為人妻，婚後揚言會努力造人的她，終於傳來喜訊。本報前日拍到肚凸凸的翠翠拖實老公甜蜜出巡食自助餐，見她身形圓潤不少，一人食兩份，相當好胃口！同日翠翠率先向本報證實懷孕近四個月，她指做產檢仍未證實BB性別，但想要男嬰的老公問中醫「貼士」後，十分開心，更笑言BB要似自己。
【圓潤現肚】■肚凸凸的葉翠翠前日拖實老公Raymond出巡食自助餐，並承認已陀B四個月。
【老公傍實】■穿平底鞋的翠翠，下身明顯圓潤不少，由老公輕扶上樓梯。
【勁擦Buffet】■陀B的翠翠胃口超好，吃自助午餐由頭吃到尾。
尚有兩個多月便踏入雞年，繼車婉婉、張名雅及楊愛瑾先後宣佈陀B後，去年7月嫁給拍拖僅十個月、任建築公司副董事周曉東的葉翠翠，前日宣佈造人成功，將於明年添「雞丁」，她說：「係有咗三個幾四個月呀！因為老公怕BB小器，之前全部人都冇講，屋企人都係上一、兩個星期先知道。」
問婚後全力造人的翠翠，坦言等這天等了很久，她笑說：「屋企有好多驗孕棒，唔同牌子加埋有幾打，今次都用咗三個唔同牌子驗。」翠翠又說：「我一直都有調理身體，知道有咗好開心，呢個係上天送畀我嘅禮物，我喺生日前知道呢件事，而預產期就會喺老公生日前。至於呢個消息可以講得畀人知嘅日子，又咁啱係奶奶生日，所以呢份係送畀奶奶最好嘅生日禮物。」
■翠翠今年7月於微博上載泳照，當時仍未知自己造人成功。
老公感動到喊翠翠又爆老公得悉她陀B好開心，她每次做產檢都堅持同行，她笑謂：「有次去做檢查，明明BB只得2cm大，老公已經話BB似佢，連醫生都忍唔住笑。」為了給老公驚喜，翠翠指當日她驗孕得知「中獎」後，未有第一時間通知老公，她說：「我忍到黃昏6點左右，我呃佢唔舒服，叫佢即刻返屋企，同時已經喺廁咗set咗個壇，放好晒啲驗孕棒，再寫住「I am pregnant」，我叫佢幫我入去攞廁紙，點知佢幾次都見唔到，見到嗰時就以為我整蠱佢，當知道係真，佢即刻感動到喊。」
採訪：小米
攝影：黃曉程、朱志聰
|
鍾意就快D Share啦！
|
|
|
