【東方日報專訊】現年71歲的藝人李家鼎最近憑《阿爺廚房》爆紅，隨即被起底，指他與近60歲的女友拉埋天窗！李家鼎受訪時承認有穩定女友，但否認再婚一事，還指現在依然多女埋身，但不會沾花惹草。
一向給人「硬漢子」形象的李家鼎（鼎爺），最近放下刀劍，拿起鑊鏟主持《阿爺廚房》教整古法粵菜，獲得網民激讚，人氣急升，人紅自然多人講，李家鼎與施明離婚多年，甚少有緋聞，近日突然被傳出他與年近60歲的女友再婚，組織家庭。李家鼎接受訪問時斷言否認：「冇咁嘅事，你哋可以去查吓，明白大家各有辛苦處，但係都唔係作古仔嘛！有就有，冇就冇，我係有個女朋友，拍咗拖幾年，但就冇結婚！」對於有傳他與大仔李泳漢相處並不融洽，他否認說：「唔係，我同兩個仔都冇嘢，佢哋比較內向，唔鍾意乜嘢都講啫！佢哋都有同佢（指女朋友）飲過茶，細仔（李泳豪）飲得多啲！」
煮埋飯畀女友食
李家鼎揚言跟女友感情不錯，大家相處舒服，對方永遠不會在他工作時致電給他：「佢好少打電話搵我，雖然我依家都會有女人想識我，但我唔會囉！都已經呢個年紀，傻嘅咩！佢好信我。（相處得咁好，會否考慮再婚？）老土啲講一句，隨緣」李家鼎廚藝了得，但女友卻完全一竅不通，問到平時有否煮飯畀女友食？他說：「佢係無飯主婦，教極都入唔到腦，所以通常都我煮飯。」及至昨晚九時半，李家鼎離開西貢寓所外出放狗，期間見他頻頻玩弄愛犬，及後匆匆返家，全程未見女友蹤影。
而李泳豪對於爸爸李家鼎拍拖一事，他透露現身在內地不方便回應。另外，李泳豪前女友楊思琦透露雖然未了解事件，但若對方拍拖會恭喜他：「拍拖係好事，一定會恭喜佢，但都有一段時間沒有見過佢哋，但會送上祝福。」
李泳漢尊重老竇決定
李家鼎大仔李泳漢接受電話訪問時表示知道父親有新的生活，對於外界指他與父親及其女友不和，泳漢指一切都是謠言，他說：「咁我結婚都有請佢，我一直都好尊重我老竇，始終佢係長輩，我哋身為後輩嘅唔方便去評論，佢咁大個男人，會識得點樣處理佢嘅幸福。而我要做嘅就係照顧媽媽、老婆同個仔，希望大家畀多啲空間我父母。」問到母親施明的近況？他說：「媽媽好開心，日日都忙湊孫。」
文：名人組
攝：追蹤組
是日精選
|
鍾意就快D Share啦！
|
|
|
