老闆，俾次機會藝人做直播，蝦碌咗當搞氣氛，之但係，若然蝦碌嗰個係新聞報導員，對住鏡頭，笑又唔係，喊又唔得，嗰種情何以堪狼狽法，可以想像到！事緣噚晚無綫晚間新聞，有個記者叫楊家駿，喺尖沙嘴報道香港未來幾日天氣時，連環食螺絲。其實新聞報道員食螺絲見怪不怪，偏偏呢個記者嘅新聞畫面，事後俾網民瘋轉……原因係佢做咗一個動作，加埋幕後人員嘅反應，連消帶打之下，就係咁，即時成為網絡紅人！一開始，楊家駿好順利講晒呢個禮拜嘅天氣，但係講到星期六除夕就開始緊張，想講最高氣溫20度，點知就講咗「最雞……最都……最高氣溫會……」，講咗3次先成功。唔知係咪因為失誤咗一次，之後楊家駿連續重複講咗兩次「會升到20度左右」(有網民抵死話：「即係升成40度？會死人㗎喎！」)。壓力，係會令人緊張，到後來，佢直頭緊張到腦海空白一片，結果楊家駿喺鏡頭面前，直接拎部iPhone偷睇稿紙！而呢件事嘅終極花生位……係幕後攝影師同打燈人員喺度大笑啦，喂！收晒音鏡頭一轉，又去番主播陳嘉欣好淡定咁繼續報道新聞，兩個對比，形成強烈嘅灰諧位！成個過程雖然好有喜感，不過大部份嘅網民都擔心，今日會再見唔到呢位記者朋友，有網民甚至向新聞部最高話事人袁志偉求情，叫佢做做好心，就嚟新年，咪請人食魷魚咁陰功囉！
| 網民話食螺絲正常，但無啦啦拎個iPhone出嚟就大件事！而網民亦讚陳嘉欣忍笑功力勁！(電視新聞截圖) | | |
| | | |
| |  |  |
來源 source: http://s.nextmedia.com
|
鍾意就快D Share啦！
|
|
|
