張繼聰爆「爭產」罵戰笑Kay似強盜
出名和謝安琪是恩愛夫妻的張繼聰，前晚突然在網上向謝安琪「開火」，兩公婆為一套日本著名漫畫《男兒當入樽》而展開「罵戰」，張繼聰更直言：「呢次真係天后都冇面畀！」事後張繼聰受訪時自爆「振夫綱」成功，謝安琪聽晒佢話！
藝人張繼聰與歌手謝安琪（Kay）是圈中模範夫妻並育有一子張瞻，Kay今年年初宣布停工一年休息，今年九月本報率先獨家披露Kay佗B女，雖然張繼聰工作忙得不可開交，但一有空檔時間便陪伴老婆，是圈中好男人代表。
振夫綱：套書我Keep硬！
近日二人為B女出世做準備，前晚約十一時張繼聰在社交網站自爆與Kay為了一套90年代紅極一時的日本漫畫《男兒當入樽》發生「口角」，張繼聰發文指執房期間找到《男》漫畫，但Kay殺出指自己才是漫畫擁有者，並揚言要將它送給別人，冇得留低！他留言：「搵番呢套對我成長有奠定性影響嘅珍藏出嚟。誰知有人同我爭拗咗好耐，振振有詞話係佢買嘅……嗰一刻，我覺得佢好陌生好似一個強盜，我阿媽話要讓吓老婆……我話OK，點知佢話送畀人反正我唔睇……Come on！佢唔明白，到我哋呢種年紀，入樽已經唔係用嚟睇，係用嚟供奉……男人嘅青春同熱血係唔可以畀人，Never！！呢次真係天后都冇面畀！我兜口兜面細細聲同佢講，套書我Keep硬！威呢！？」
對於老公公開指控，Kay不甘示弱，未知是否嬲到爆炸，事隔三小時即凌晨時份在張繼聰貼文中留言：「呢套入樽係我ｏ架！當年我細本同大本版各一套，擺喺床邊陪我好多年，咪見到入樽就以為係自己嘅，好冇呀？」不少網友見狀分為兩黨，有支持張繼聰的網民叫他絕不可退讓！而力撐Kay的網友則叫張繼聰讓老婆，亦有網友表示天氣轉冷，「溫馨提示」張繼聰拎多張被準備做「廳長」，但亦有持中立的網友指可能一屋藏兩套漫畫。
傾掂數搵靚位「供奉」漫畫
張繼聰昨日接受本報電話訪問時自爆「振夫綱」成功，令漫畫有得留低：「都係生活情趣，我揭示到年輕夫妻嘅生活狀況，當然去到最後老婆都有聽我話畀我留番低，呢啲係青春回憶。睇佢斯斯文文原來都係入樽粉絲，大家又再認識深咗。」至於「輸家」Kay則表示到現在還未知道漫書的真正擁有者是誰，為消除張繼聰「怒氣」，將會好好「供奉」漫畫書：「因為我哋都有呢套漫畫，結咗婚之後唔知點解得番一套，佢順理成章唔會覺得呢套係我嫁過嚟嗰套。第二係佢覺得我唔睇，都要好好搵個地方供奉佢，我覺得轉贈畀他人仲好啦。依家套漫畫書仲喺度，其實我係諗住第時要擺兒童書，所以清咁啲書，依家張先生覺得咁緊要，我要騰出當眼而好隆重嘅位置擺呢一套漫畫書。」
採：音樂組
文：專案組
|
鍾意就快D Share啦！
|
|
|
