名人動態
Mark實何超蓮 方力申邁向菁英會
今年三月，方力申宣布跟拍拖十年鄧麗欣分手後，上月被本刊踢爆他撻着賭王何鴻燊三房千金超蓮，二人同到尼泊爾拍拖做義工，又孖住為 ViuTV電視節目錄音，何家千金更力讚小方是個好可靠的朋友。
獲女友欣賞，為縮短跟千億何家距離，今個月中，方力申掹住朋友衫尾，參加權貴二代菁英會活動，還在競飲賽中跟莊氏集團太子爺莊家彬鬥飲啤酒，搶晒 fo。
好飲得
由一班富二代組成的菁英會，早前在灣仔皇朝會舉行每年一度聖誕 P，去年有出席且極受歡迎的何超蓮，今年卻未見影；反而「好朋友」方力申，就由剛入會的委員陳緯邦帶住入場，現身派對。
「嗰晚有成兩百幾人參加，如果方力申唔係同 Bon Bon（陳緯邦）一齊參加啤酒競飲比賽，都未必有咁多人留意到，佢仲要同（莊）家彬喺台上鬥飲，家彬出名酒筲箕，佢都係慢咗少少，方力申都好飲得。」在場的菁英會員說。
身為一四年十大傑青，又有個開畫廊買賣藝術畫的老豆，曾經是港隊游泳代表的方力申，背景有番咁上下，但跟賭王女相比，依然有相當距離。
入會難
要融入女友富貴生活圈子，方力申亦不敢怠慢，搭通天地線，由一班權貴二代成立的菁英會聖誕活動開始。
「如果方力申真係要做會員，佢一定要多啲出席菁英會搞嘅活動，仲要幫手做嘢有貢獻，俾多啲會員認識，之後仲要有兩至三個人推薦入會，不過咁都未算係正式會員；佢仲要去北京讀一星期國情班，先有正式資格。」一名菁英會員說。
女友是賭王之後，被踢爆雙雙到尼泊爾做義工，方力申對戀情更謹慎，就算去睇張學友演唱會，二人亦分開去，睇前後兩晚。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|