探熱針
收埋男友換獎 李佳芯又斷正
有得就有失！為擔正做女一，李佳芯放棄同 viuTV主持男友陳炳銓西貢同居。在剛過去的「萬千星輝頒獎禮」揮低大熱劉佩玥、朱千雪奪得「飛躍進步女藝員」的她，更向公司承諾將戀情進一步密封。
講得出做得到，約好男友在又一城見，李佳芯零妝戴帽戴眼鏡，平凡到幾乎認唔出；點知陳炳銓唔生性，要女友踱來踱去三粒鐘先蒲頭，鬼祟約會斷到正，難得李佳芯仲識笑，果然好戲。
易容行商場等仔
素顏戴了眼鏡和帽的出爐「飛躍進步女藝員」得主李佳芯，要不是將漁夫帽拉到近眼簾，更易走漏眼。
大時大節，又一城商場四圍都係人，李佳芯一邊傾電話，一邊漫無目的四圍行，但大家都未有察覺這個大台上位花旦。最後，她索性匿埋一角煲電話粥，一傾大半小時，才捨得收線。
在商場閒逛，李佳芯目標明確，只對減價的鋪頭有興趣，雖然自己一個，但她的戒備心不減，只要有途人行近，便由頭 scan落腳，甚至刻意耷低頭，避開同其他人有眼神接觸。首飾、精品店逐間睇，之後轉去正值大減價的 H&M，在大片衫海中，李佳芯忘我「尋寶」，玩足兩小時才拍板買。
由六點行到接近九時半，收到一個電話後，李佳芯即急步離開商場，遊又一城三小時，原來是等揸住四驅車到的陳炳銓，斷到正，已經上了車的她馬上落車，避開記者狂影二人合照。「 Hello! Hello!已經跟咗好耐囉，都應該，哈哈！……冇化妝，唔好影得咁清楚！」李佳芯笑笑口說。
起步遲要發力追
李佳芯表現避忌，據知和她答應公司將戀情進一步密封，結果成功砌低其他強手奪得「飛躍進步女藝員」有莫大關係。
「 Ali（李佳芯）成三十歲先嚟拍劇，起步比人慢，所以要好努力，今年頒獎禮競爭咁大，公司都肯 offer個交換條件俾自己，佢梗係𦧲飯應」一名無綫人說。
機會可一不可再，獲獎後被問到何以未有多謝男友陳炳銓時，李佳芯大耍太極，「邊個係我男朋友？如果有老公，會多謝老公！」
愛情同事業，李佳芯心中有把秤。
撰文、攝影、攝錄：娛樂組
|
鍾意就快D Share啦！
|
|
|